Honorius, episcopus, servus servorum Dei, dilectis filiis decano et capitulo Ambianensi salutem et apostolicam benedictionem. Cum a nobis petitur quod justum est et honestum, tam vigor equitatis quam ordo exigit rationis ut id per sollicitudinem officii nostri ad debitum perducatur effectum. Eapropter, dilecti in Domino filii, vestris justis precibus inclinati personas vestras et Ambianensem ecclesiam in qua divinis estis obsequiis mancipati cum omnibus bonis que in presentiarum rationabiliter possidetis, et in futurum, dante Deo, justis modis poteritis adipisci, sub beati Petri et nostra protectione suscipimus : specialiter autem possessiones, libertates et immunitates, necnon approbatas et rationabiles consuetudines ecclesie vestre, dummodo in nullo penitus obvenit canonicis institutis, sicut eas juste ac pacifice obtinetis, vobis et per vos eidem ecclesie auctoritate apostolica confirmamus et presentis scripti patrocinio communimus. Ad hec autem, auctoritate presentium inhibemus ne quisquam in ecclesia vestra in canonicum admittatur qui non sit de legittimo matrimonio procreatus, vel qui hoc, salva conscientia, suo firmare valeat juramento, sicut hactenus in ipsa ecclesia dicitur observatum, salva tamen apostolice sedis auctoritate. Nulli ergo.…
Datum Laterani IIII idus novembris, pontificatus nostri anno primo.
Cartulaire du chapitre de la cathédrale d'Amiens, t. 1, Amiens, 1905 (Mémoires de la société des antiquaires de Picardie; Documents inédits concernant la province, 14), n° 149, p. 194-195
cartulaire
Amiens, AD Somme, 4 G 2966 (« cartulaire I » du chapitre cathédral d’Amiens),