Testament d’un individu, passé devant l’échevinage et validé par le doyen de la collégiale Saint-Amé.
(Au dos): Testamentum Egidii Spesce.
Ce sacent tot cil ki sunt et ki avenir sunt que jou Gilles Pese, ki ai le pooir entirement de tot çou que dame Helins Pese, me mere, a en meubles et hors meubles, en fac men testament en tel maniere. Je doins à l’eglise de Saint-Amé, por men obit et men pere et me mere, marc et demi de rente: si en donra-on demi marc au pain des povres, le jor de l’obit. Si doins au mandé un marc, et 2 mars en amendement de 2 povres capeleries de Saint-Amé, là u on les asera por le mius, et un fierton à ceus ki porteront le chief Saint-Amé à porcesion à dobles festes: si recevera et departira cest ferton cil ki departira les obis. Et si doins un marc de rente as Mesiaus à pitance au jor que il feront laiens no obit, et à l’eglise de Saint-Piere un fierton, en l’acroisement de l’obit men pere et me mere et le mien. Et tote ces terente ki cidevant est devisée, prendera-on sor me maison de le rue des Foulons, deci adonc que cil ki le maison tenra en ara racaté 4 mars u 6, de 14 mars et demi le marc; et de ces deniers racatera-on 4 mars u 6, alleurs ù on les trouvera mius seans. Et ces ausmosnes ki ci sunt devisées aseneront mi testamenteur, selonc çou que il veront que bon sera. Et de me maison ki siet dedens le porte d’Aras, veu-jou ke mi testamenteur aient pooir de vendre por delivrer as besognes me mere, se mestiers li est, et se on le puet detenir, je vœl que li testamenteur le puissent vendre por acater iretage alleurs, u le maison doner à iretage et cel iretage departir por nos ames, ensi que il veront que mius vaura. Et tos ces lais fai-jou apres men deces et le me mere. Si en fac testamenteurs signeur Thomas Hombelon, maistre Estevenon de Chisog, Jehan Le Blas Pilate et Wiber de le Claviere, sauf çou que je retieg le pooir de me devise muer et cangier et del tot rapeler à me volenté.
Et à ceste devise furent con eskevin Oliviers de Deiœl et Lanvins Pilate.
Et ce fu fait en l’an ke li Incarnations avoit M et CC ans et XXXVIII, el mois de mai.
Et por çou ke ce soit ferme cose et estable, nos avons fait ces letres saieler del saiel maistre Thomas Pikette, le doien de Saint-Amé.
ESPINAS (Georges), La vie urbaine de Douai au Moyen-âge, t. III, pièces justificatives. XIe-XIIIe siècles, n° 53, p. 39-40.
original
Lille, AD Nord, fonds de la collégiale de Saint-Amé de Douai, cart. 5