Super hoc quod domina Hawis, uxor domini Petri, militis, de Granchiis, vendidit fratribus milicie Templi granchiam suam decimariam
Frater Johannes, pauperum Domus Dei Pruvinensis minister humilis, universis presentes litteras inspecturis, salutem in Domino. Noverit universitas vestra quod domina Hawys, uxor domini Petri, militis, de Granchiis, in presentia nostra constituta, recognovit se et maritum suum vendidisse fratribus milicie Templi granchiam suam decimariam cum porprisio sitam apud Plesseium Poilechien, et vinginti tres sextarios bladi, quos habebant annui redditus in eadem granchia, videlicet undecim sextarios frumenti et duodecim sextarios avene pro nonaginta sex libris pruvinensium, quas eidem H[awidi] et marito suo dicti fratres persolvunt. Et venditionem istam voluit et laudavit dicta H[awis] coram nobis et quitavit memoratis fratribus dictum bladum cum granchia in perpetuum pacifice possidendum. Fiduciavit etiam in manu nostra quod contra dictam venditionem ullatenus de cetero non veniret. In cujus rei testimonium, ad petitionem utriusque partis, presentes litteras sigilli nostri munimine fecimus roborari. Actum anno gratie Mº CCº XXº IIIIº, mense decembri.
CARRIERE (Victor), Histoire et cartulaire des templiers de Provins, Paris, 1919, n°LII