Super hoc quod Symon, locum tenens prioratus Sancte Marie de Pontibus super Secanam dedit fratribus militie Templi quandam petiam terre site ante molendinum de Varanna.
Omnibus presentes litteras inspecturis, H[emericus], christianitatis Pruvinensis decanus, in Domino [salutem]. Noverit universitas vestra quod, in nostra presentia constitutus, Symon, locum tenens prioratus Sancte Marie de Pontibus super Secanam et clericus illustris regis Francie, recognovit coram nobis se dedisse ac concessisse fratribus milicie Templi quandam peciam terre, site ante molendinum de Varanna eorumdem fratrum, que de dicta ecclesia movere dinoscitur, imperpetuum possidendam, sub censu duodecim denariorum in festo beati Remigii, et unius sextarii avene in c[r]astinum natalis Domini, dicto prioratui a dictis fratribus apud Froides Paroiz annuatim reddendorum. Promittens coram nobis dictus Symon bona fide se, in omnibus et contra omnes, soluto cum avena dicto censu, dictis fratribus super dicta donatione veram garantiam portaturum. Et si dicti fratres dicte prioratui prefatos duodecim denarios cum avena loco et terminis prescriptis non reddiderint, dictus prior ad dictam teneuram, vel alius loco ejus substitutus, ut dominus terre, posset assignare et tandiu in manum suam et saisinam tenere quousque predicta sibi fuerunt soluta competenter. Ad cujus donationis et concessionis confirmationem, ne dicti fratres super hiis possent in aliquo molestari, prefatus Symon litteras abbatis et conventus de Cormeri, sub presenti forma scriptas et sigillis eorundem munitas, dictis fratribus debet deliberare. Et dicti fratres litteras fratris Anselmi, preceptoris domorum milicie Templi in Bria, sigillo ejusdem munitas versa vice debent eidem priori deliberare de dicti censu testimoniales. In cujus rei testimonium et munimen, presentes litteras, ad petitionem utriusque partis, sigilli nostri caractere fecimus insigniri. Actum anno Domini Mº CCº XXXº nono, mense augusti.
CARRIERE (Victor), Histoire et cartulaire des templiers de Provins, Paris, 1919, n°L