Général
-
Raoul, duc de Lorraine
-
Hesse de Sommerviller, chanoine de Saint-Georges et curé de Champenoux
-
Raoul, duc de Lorraine
-
-
FRANCE, Nancy, Archives départementales de Meurthe-et-Moselle, G 349 n° 4
-
Original sur parchemin, jadis scellé de deux sceaux sur double queue
-
français
-
non suspecté
-
Lettre
-
Original
-
Raoul, duc de Lorraine, établit l’office d’aumônier de la collégiale Saint-Georges de Nancy et nomme Hesse de Sommerviller, chanoine de Saint-Georges et curé de Champenoux. Mathieu de Nancy, prévôt du chapitre, scelle avec le duc.
-
01. Nous Raoulz dus de Loheraine et marchis fasons savoir a tous que comme pour le saluit de nostre arme et des armes de nous predecessours
02. nous soiens et doiens eistre meus en pitié de faire augmentation et d'acomplir lou service devin meismement en l'englise nostre signour
03. saint Geoirge de Nancey qui est nostre chapelle et de nostre fundation ; pour ceu est il que dés mentenant nous establissons et avons estaubli en
04. la dite chapelle un office con appellerait l'office de l'amonerie ; et est et serait de tel nature et de tel condition cilz dis offices que cilz que serait
05. amoniers serait tenus de doneir le pain d'un resaul de bleif pour Nostre Signour as poures chascun an le jour de feiste monsignour saint George
06. et deverait paier lez menestreis qui serviront lez malades a dit jour de la feiste et la vigile. Encor serait tenus li dis amoniers de doner
07. le pain d'un resaul de bleif wain pour Deu le jour con ferait nostre anniversaire chascun an et le grant venredi un resaul en semblant maniere
08. et deverait laveir lez piés as poures jusqu'a treze poures le grant juedi et donrait a un chascun d'eaulz un denier toullois ; lez quelz chosez
09. et missions li dis amoniers panrait chascun an sus lez issues et profis de nostre grant saiel ; et ausi averait li dis amoniers chascun an pour son
10. fié et pour rason dou dit office seix livreez de terre a petis tournois chascun an sus les dites ixues de nostre grant saiel qu'il tanrait et averait jusques
11. a ceu que nous li averons assignei autre terre pour le dit office a la valour dez dites seix livreez de terre ou de plux selonc ceu que nostre devo-
12. -tions le nous donrait et li devons encoir doneir une mason a Nancey soffisant li queile serait heritages a tous jours maix a dit office.
13. Encor volons et outrions que li terre dou dit office qui est et qui pour le temps serait soit exempté et fuers de nostre juridition seculeire
14. en toutes choses fuers soulement la franche wairde; et la prometons a wardeir et deffendre a tous jours maix envers tous et contre tous
15. a nos propres costanges ensi com nostre propre heritage. Et senci estoit que li dis amoniers qui est ou sui successour aprés lui fasoient aucuns acquas
16. pour rason dou dit office nous yceaulz devons afranchir et amortir toutes celles foix que nous en serons requis et par nos lettrez de nostre
17. grant saiel et le devons faire a nos propres costanges soit en fiés, en arrierfiez ou en wardes sauf ceu que nous n'en perdiens hommes. Encor est
18. nostre grei et nostre volentei que li dis amoniers et sui successour aprés lui aient teil franchise et tel libertei comme office ou digniteis d'englise puet
19. et doit avoir tant de droit com de costume por le salut de nostre arme et des armes de nos predecessours ; et que la masons ou li dis amoniers
20. serait demorans en la ville de Nancey soit de franche condition et de franche libertei a tous jours maix a celle fin que tuit malfaitour qui leans
21. iraient a refuge soient seur de lour coirs sens faire nulle force ne nulle violence tout ensi com il seroient aleir a refuge devant le grant
22. auteil de nostre chapelle. Encor volons et outroions que li dis amoniers et sui successour aprés lui aient lour usaige et lour affoage en tous
23. nous boix et la pecherie en nous awes rivieres que ne seroient vendues de nostre recevour et le pesturage par toute nostre terre et par tout nostre pooir
24. sens paier amende ne pargie ne autre redevance a nulz jours maix exceptei nostre boix de Sorru tant solement ; et senci estoit que li dis
25. amoniers acquastait aucunes grenges ou masons pour le dit office fut a vie ou en heritage ou que on les amonait a dit office nous volons que
26. cilz qui serient demorant es dis leus qui serient de la mesnie dou dit amonier soient franc et quite de toutes tailles de toutes prises de
27. toutes impositions et servitutes con lor pourroit demander d'os et de chivachiés et de tous commandemens. Encor est assavoir que nous avons
28. retenu et retenons pour nos et por nos hoirs dus de Loheraine la collation et la donation dou dit office a tous jours maix et dès mentenant dou
29. dit office et de toutes sez appendises nous en avons envesti et envestons et mis en corporel possession comme le premerain amonier nostre amei
30. et feauble chapellain signour Hesse de Someviller chenoinne de nostre dicte chapelle et curei de Champenolz au quel nous avons promis et
31. prometons pour nos et pour nos hoirs que toutes les choses dessuz dites ensemble lez franchises et liberteis nous tanrons et ferons tenir
32. par nostre foi et par nostre sairement fait sollenneement sus saintes ewangiles a nostre leaul pooir sens riens venir encontre par nulle vue que soit
33. et des mentenant nous en obligons nous et nos hoirs a tous jours maix. En tesmoingnage de veritei nous avons fait metre nostre grant
34. saiel pendant en cez presentes lettrez ; et avons priei et requis a discretes persones et honestes nos bien amez Maheus de Nancey prevot de la dite cha-
35. -pelle et a tout le chapitre de celui meisme leu qu'il wellent metre lours saielz avec le nostre en cez presentes lettrez en tesmoingnage de veritei
36. et en signe que c'est lour grei et lor volentei tant com a aulz apartient et puet apartenir; et nos Maheus […] prevos et chapitre de la devant
37. dite chapelle qui a la dite fundation dou dit office et a tout ceu que ci dessus est escrit et divisei nous sommes agreei et consenti, agreons
38. et consentons et a la requeste de nostre trés chier signour et fondour Raoul duc dessus dit tant comme a nos touche et puet touchier avons
39. mis nous saelz en cez presentes lettrez avec le suen en tesmoingnage des chosez dessus dites, que furent faites l'an de grace Nostre Signour mil trois
40. cens quarante et dous on moix d'avril. -
« 1341 / Pour l'amonerie de la fondation / franchise [...] faite / par le duc Raoul », XIVe s.
-
-
-
-
-
-
-
-
-
Laura Gili-Thébaudeau
Sigillographie
-
non
-
Deux sceaux sur double queue, perdus
Informations
Acte
Laura
Gili-Thébaudeau
(Université de Lorraine), dans
TRANSSCRIPT
TRANSSCRIPT Project. Writing and Governance. Cultural transfers between France and the Empire (13th-16th centuries), dir. I. Guyot-Bachy (CRULH) et M. Margue (IPSE), éd. électronique TELMA (IRHT), Orléans, 2017 [en ligne], acte n. 21244 (transscript-461), http://telma.irht.cnrs.fr/chartes/transscript/notice/21244 (mise à jour : 19/11/2018).