Theobaldus, Dei miseratione, Ambianensis dictus episcopus, presentibus et futuris imperpetuum. Quoniam per temporum successiones, humanarum rerum status immutatur, et quod aliqando geritur, aut oblivione intercidit, aut decedentibus auctoribus, ad posterorum notitiam non pertransit, discreta patrum consuevit auctoritas, res gestas litteris commendare, ut quod bono studio geritur, per malum contentionis et discordie nullatenus perturbetur. Noverint itaque universi presentes pariter et futuri, quod Hugo de Creusa partem decime de Sainterlies, tertiam videlicet garbam, quam in anime sue periculum diu detinuerat, demum sano adquiescens consilio, in manus nostras resignavit, concedente Waltero, milite, de Paillart, ad cujus feodum predicta decima spectare dicebatur, et duobus ejusdem Walteri filiis, Bernardo et Johanne ; hoc idem concedentibus et uxore predicti Hugonis, que ab imtio reclamavit, asserens sibi dotem in ea parte decime, fuisse constitutam. Verum tamdem, coram nobis hoc idem concessit, recepta a marito, ut dicebatur, sufficienti recompensatione. Nos autem, decimam ipsam in manus nostras taliter resignatam, ecclesie de Selincort que prefatum Hugonem datis sexaginta libris duacensium ad resignandum induxerat, in perpetuam concessimus et dedimus elemosinam, quod ut ratum et inconcussum perseveret, presens scriptum sigilli nostri munimine confirmamus. Testes autem hii sunt : T[homas], Sancti Johannis Ambianensis, et G[osselinus], Sancti Andree abbates, R[adulfus] Pontivensis archidiaconus, Guido et Radulfus, presbiteri, Rogerus diaconus, Matheus subdiaconus. Actum est hoc anno mº cº lxxxº ixº.
BEAURAIN (G.), Le cartulaire de l'abbaye de Selincourt, 1131-1513, Amiens, 1925 (Mémoires de la société des antiquaires de Picardie, 25), n° 18, p. 62-63