Enguerran, prieur, et toute la communauté d'Arrouaise, notifient que l'abbé Robert a vendu à l'abbaye de Cercamp la cour de Beaulieu avec toutes ses dépendances, et approuvent cette vente.
Uniuersis ad quos presentis scripti noticia peruenerit, frater Ingelrannus prior et humilis conuentus Arroasie, salutem in Domino. Multis et grauibus infortuniis ad summam penuriam deuoluti, et debitis intolerabilibus astricti, prudentium uirorum usi consilio omnimodis captauimus uiam euadendi. Unde, dilectissimi patris et abbatis nostri Roberti prouisioni nos unanimiter commendantes, ipsi omnes res nostras commisimus, et quasdam ex ipsis uendi rogauimus, quatinus imminentis desolationis periculum euaderemus. Qui, mox consilio nostro et assensu communi omnium nostrorum fretus, possessiones nostras quas uoluimus uendidit et inde duo milia et CCC libras Parisiensium de nostro debito soluit; de rebus uero nostris mobilibus nichilominus duo milia et D libras Parisiensium faciens quibus debebantur persoluit et hec nobis astantibus patenter enucleauit et quid uendidisset et cui soluisset in presentia nostra fideliter elucidauit. Proinde uniuersitati uestre significamus ipsum de assensu, consilio et uoluntate nostra hec omnia perfecisse et hanc inde paginam sigillo capituli nostri uolumus communire. Testes Iohannes quondam abbas Arroasie, Arnulfus quondam abbas Calniaci, Ingelrannus prior Arroasie, Andreas prepositus, Radulfus prior de Margellis, Willelmus prior de Domnio, Iohannes, Symon, Robertus, Reinfridus, Egidius, Lambertus, Godefridus sacerdotes et canonici et omnes alii tam parui quam magni tam clerici quam laici. Actum anno Domini M° C° XC° nono, III kal. maii.
TOCK (Benoît-Michel) et MILIS (Ludo), Monumenta Arroasiensia, Turnhout, 2000 (Corpus Christianorum, Continuatio Mediaevalis, 175), n° 234, p. 400-401