Frumaud, évêque d'Arras, notifie la donation du tiers de la dîme de Méricourt effectuée par Sagualo Hukedeu aux Templiers d'Arras et à l'abbaye de Marœuil.
In nomine sancte et individue Trinitatis. Ego Frumaldus, Dei gratia Atrebatensium dictus episcopus, tam futuris quam presentibus in perpetuum. Que pro salute animarum ecclesiis ad sustentationem servientium Deo in elemosinam dantur, necessarium duximus litterarum monimentis annotari et sigillo nostro muniri et testibus corroborari, ne vento oblivionis dispersa vel a memoria elabantur vel per posteritatem malignam maliciose distrahantur. Notum itaque facimus tam futuris quam presentibus, quod Sagualo Hukedeu emit a Wicardo de Roveroi et heredibus suis terciam pertem totius decime de Menricort. Quam cum libere haberet in potestate sua, per secundum et tercium dominum, ad quos spectabat decima illa, dedit eam in elemosinam Templaribus Atrebatensibus et ecclesie de Mareolo, sub hoc videlicet considerationis et deliberationis obtentu quod singulis reciperent annis illius tercie partis decimae Templares prescripti medietatem et ecclesia de Mareolo medietatem equaliter distributam. Cum itaque sic deliberasset, predictus Sagualo illam terciam partem decime de Menricort nobis reddidit, et nos assignavimus Templaribus Atrebatensibus et ecclesie de Mareolo eo tenore, qui suprascriptus est, possidendam. Hujus donationis et elemosine sunt testes sacerdotes hii subscripti : Petrus decanus, Willelmus de Ervesem, Tybertus capellanus, Gillebertus Templariorum presbiter, Hugo presbiter de Bitunia, Balduinus Rufus dyaconus, Alelmus frater Hugonis sacerdotis subdiaconus, Gualterus Carboneaus acolitus et laici Hugo Camerarius, Revo nepos Clarenbaldi archidiaconi, Arnulfus et Jacobus. Actum anno Domini Mº Cº LXXº Vº, mense octobri, comite Flandr. et Viromand. Philippo, Balduino de Gandavo Templarium magistro, Eustachio provisore Parisiensi, Renero Atrebatensi, Martino abbate de Mareolo.
TOCK (Benoît-Michel), Les chartes des évêques d'Arras (1093-1203), Paris, 1991, n° 167, p. 187-188