Alvise, évêque d'Arras, concède à l'abbaye de Saint-Bertin l'autel de Barlin.
In nomine Patris et Filii et Spiritus Sancti, amen. Ego Alvisus, Dei miseratione Atrebatensis episcopus, universis sanctae matris ecclesiae filiis in perpetuum. Supernae miserationis respectu ad hoc pastoralem curam suscepimus et ecclesiae regendae sollicitudinem gerimus, ut justis precantium votis faveamus et omnibus divino cultui insistentibus, quantum Deo donante possumus, subvenire debeamus. Proinde juxta petitionem tuam karissime frater Leoni venerabilis abbas Beati Bertini, tibi tuisque successoribus pro anime nostre et predecessorum nostrorum redemptione altare de Ballin perpetuo tenendum concedimus et auctoritatis nostrae privilegio confirmamus, salvo in omnibus jure Atrebatensis episcopi et ministrorum ejus. Si quis vero hujus nostrae confirmationis paginam temerario ausu violare temptaverit, cum Symone mago anathema sit. Ut autem hujus auctoritatis paginam ratam et inconvulsam permanere faciamus, praesentium testium signa subnotari precepimus et ad memoriam futurorum conservari. Signum Petri prepositi. S. Nicholai decani. S. Thomae cantoris. S. Herberti sacerdotis. S. Roberti subdiaconi. S. Gualteri abbatis Sancti Vedasti. S. Johannis prioris. S. Guillemi monachi et sacerdotis. Ego Alvisus, Dei miseratione Atrebatensis episcopus, hoc privilegium relegi, subscripsi et in nomine Patris et Filii et Spiritus Sancti propria manu confirmavi. Actum Atrebati, anno Dominicae Incarnationis Mº Cº XLº I, indictione IIIIa, episcopatus autem domini Alvisi Atrebatensis episcopi Xº.
TOCK (Benoît-Michel), Les chartes des évêques d'Arras (1093-1203), Paris, 1991, n° 72, p. 87-88