Bulle d'Innocent IV contre les ravisseurs des biens de Notre-Dame-aux-Nonnains.
Innocentius... dilecto filio decano ecclesie Sancti Quiriaci de Pruvino, Senonensis diocesis, salutem et Apostolicam benedictionem. Obviare maliciis perversorum et quieti religiosorum consulere pastorali sollicitudine commonemur, ut illorum peccandi refrenemur audaciam, et illi devotius Domino valeant famulari. Cum itaque, sicut dilecte in Christo filie, abbatissa et conventus Beate Marie Trecensis, ordinis Sancti Benedicti, sua Nobis petitione monstrarunt, a nonnullis qui nomen Domini recipere in vacuum non formidant, super bonis suis molestias multiplices patiantur, Nos volentes eisdem contra insolentiam et conatus malignantium providere, discretioni tue per Apostolica scripta mandamus, quatinus prefatis abbatisse et conventui contra predonum, raptorum et invasorum audaciam efficaciter presidio defensionis assistens, non permittas ipsas contra indulta privilegiorum Apostolice Sedis ab aliquibus indebite molestari, molestatores hujusmodi per censuram ecclesiasticam, appellatione postposita compescendo. Presentibus post triennium minime valituris.
Datum Perusii II kalendis maii, pontificatus nostri anno nono.
LALORE, Documents sur l'abbaye de Notre-Dame-aux-Nonnains de Troyes, 1147-1590, dans Mémoires de la société académique de l'Aube, 3e ser., 11 (1874), n° 176, p. 110.