Gautier, évêque de Laon, fait part de la donation d'un champ de terre, par Robert de Landifay, à l'abbaye de Saint-Nicolas-des-Prés: ledit champ est sis à Torcy.
De Roberto de Landiefait (pro Torcis).
In nomine sancte et individue Trinitatis. Ego Galterus Dei gracia Laudunensium episcopus. Elemosinas que racionabiliter sunt ecclesiis contribute, fideli oportet testimonio stabiliri. Eapropter, notum facimus tam presentibus quam futuris quod Robertus de Landierfait dedit ecclesie beati Nicholai de Pratis quemdam agellum de sua hereditate in elemosinam, nullo sibi jure retento, qui agellus jacet in confinio territorii de Landierfait et Torsis, juxta Burgensem silvam: hanc autem elemosinam concessit Bliardus de Firmitate quiete et absolute, de cujus feudo processit simul cum Guillermo de Apia. Quam elemosinam ut in perpetuum staret, sigilli nostri impressione communimus, et confirmamus. Hujus autem rei testes sunt: Galterus episcopus; abbas Ricardus; Lisiardus decanus; Balduinus archidiaconus; Bliardus de Firmitate; Guillermus de Apia; Robertus de Landierfait; Herbertus frater ejus; Petrus Caldarie, monachus; Albricus de Torsis; et plures alii.
Acta sunt hec anno millesimo centesimo quinquagesimo.
STEIN (Henri), Cartulaire de l'ancienne abbaye de Saint-Nicolas-des-Prés sous Ribemont, Saint-Quentin, 1884 (et dans Mém. soc. acad. des sc., arts, belles-lettres, agric. et industrie de Saint-Quentin, 4e sér., 5 (1883), p. 112-337), n° 104, p. 155.