Alexander, episcopus, servus servorum Dei, dilectis filiis Radulpho decano et canonicis Ambianensibus salutem et apostolicam benedictionem. Justis petentium desideriis dignum est nos facilem prebere concensum, et vota que a rationis tramite non discordant effectu sunt prosequente complenda. Eapropter, dilecti in Domino filii, vestris justis postulationibus grato concurrentes assensu, altare de Blangeio et kaagium cum quibusdam hospitibus et aliis pertinentiis suis rationabiliter vobis collatum devotioni vestre auctoritate apostolica confirmamus et presentis scripti patrocinio communimus. Statuentes ut nulli omnino hominum liceat hanc paginam nostre confirmationis infringere, vel ei aliquatenus contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum ejus se noverit incursurum.
Datum Verularum VI idus maii.
Cartulaire du chapitre de la cathédrale d'Amiens, t. 1, Amiens, 1905 (Mémoires de la société des antiquaires de Picardie; Documents inédits concernant la province, 14), n° 48, p. 67
cartulaire
Amiens, AD Somme, 4 G 2966 (« cartulaire I » du chapitre cathédral d’Amiens),