Geoffroi, évêque de Senlis, notifie que Samson le Brun de Baron a cédé à l’abbaye de Chaalis ses droits sur la terre que lui avaient donnée Jean de Mauregard et sa mère, mais se réserve le champart. Il reçoit de l’abbaye la somme de 45 sous. Emmeline et ses enfants Pierre et Alice donnent à l’abbaye de Chaalis la terre que Geoffroi de Moiry et son épouse Eremburge, fille d’Emmeline, avaient donnée.
In nomine sanctae et individuae Trinitatis, amen. Ego Gaufridus, Dei gratia Silvanectensis episcopus, universitati fidelium tam presentium quam futurorum paginae presentis attestatione et sigilli nostri impressione notificare curamus quod Sanson Lebrun de Berronio parochianus noster, annuentibus et volentibus filiis suis ac filiabus Thoma, Odone, Sanctissima, Heremburge, Ascelina, concessit in elemosinam ecclesiae Beatae Mariae Caroliloci terram quam Joannes de Mauregart et mater ipsius prefatae ecclesiae in elemosinam contulerunt, in cujus terrae parte predictus Sanson campartem habebat salva camparte sua arandam et excolendam ac jure perpetuo possidendam, hac scilicet conditione ut tempore collectionis messium si ipse Sanson ipsa die qua vocatus fuerit ad campartem recipiendam vel etiam secunda dia vocatus et usque ad meridiem expectatus non venerit, conversus magister grangiae vel alius jussus ab eo sub testimonio suae conversionis juste ac fideliter compartisabit et ubi statu[tu]m est campartem faciet deportari. Pro hac autem concessione ipse Sanson quadraginta quinque solidos habuit. Cujus concessioni in presentia nostra factae affuerunt testes magister Hugo Latiniacensis, Constantius capellanus noster, Radulphus Paillardus noster canonicus, Rainoldus de Crespieres canonicus de Peissi, Galterus Tournesac, Ailluardus servientes nostri, frater Guillelmus monachus et frater Galterius conversus Caroliloci. Concessioni vero filiorum suorum ac filiarum affuerunt testes Rainardus sacerdos de Berronio, Azo et Arnulphus clerici, Bartholomeus le Brun frater ipsius Sansonis, Milo, Guillelmus filius Alberici, Lambertus li Parmentiers, hi omnes de Berronio, Petrus de Montegny, Alexander de Marisy mariti duarum filiarum quarum qui et ipsi similiter concesserunt atque ut hoc idem unus filiorum Sansonis Robertus nomine qui tunc temporis absens erat concederet et teneret se fidejussores constituerunt. Item sciant omnes quod donum et elemosinam de terra quam Joffredus de Moiriaco et Eremburgis uxor sua ecclesiae Beatae Mariae Caroliloci in elemosinam contulerunt Emelina mater ipsius Eremburgis ac Petrus filius suus et Aalidis filia sua de quorum hereditate ipsa terra pervenerat Bartholomeus quoque filius Aalidis ac Petronilla soror ejus parochiani nostri de Berronio benigne concesserunt. Unde testes sunt Rainardus sacerdos noster de Berronio, in cujus presentia ipsa concessio facta fuit, Simon major de Berronio, Guillelmus de Laval. Haec igitur ut rata et inconcussa permaneant, in presenti carta voluimus scribi et sigilli nostri impressione muniri ac prescriptis testibus corroborari. Actum anno incarnati Verbi millesimo centesimo nonagesimo.