Jean, abbé de Saint-Vaast d’Arras, et le chapitre de l’abbaye notifient que dans la querelle qui les opposait à l’abbaye de Chaalis au sujet de la dîme d’Ancourt, suite à un arbitrage, ils renoncent aux dîmes sur les terres venant de Simon d’Ancourt, les terres cédées par Thomas Escornart et sur une petite autre terre, mais pas sur les autres terres dans le même territoire.
Ego Johannes, Dei gratia Sancti Vedasti Atrebatensis dictus abbas totumque capitulum nostrum, omnibus fidelibus tam posteris quam presentibus in perpetuum. Cum aliquando inter ecclesiam nostram et ecclesiam Beate Marie Karoliloci disceptatio vel potius contentio super cujusdam decime parte ad territorium de Oencurt pertinente fuisset exorta, quam videlicet decimam non solum dono sed et scripto bone recordationis Werrici predecessoris nostri simul et capituli prefata ecclesia Karoliloci sibi collatam defendere videretur, nos autem, non assensum, non sigillum capituli predicto scripto appositum ac propterea non autenticum diceremus. Tandem, post multos labores et expensas, mediantibus viris prudentibus, domino scilicet Gisleberto abbate Fusniaci ac domino Hugone Caricampi qui ad hoc negotium terminandum vel potius litis contentionem dirimendam a capitulo Cisterciensi fuerant delegati, sicut sequentia declarant, est sopita. Ego igitur Johannes, Sancti Vedasti Atrebatensis dictus abbas, assensu et voluntate totius capituli nostri, prefate ecclesie Karoliloci fratribus totam ex integro decimam illarum terrarum quas tunc temporis de Simone de Oencurt sub censu decem modiorum frumenti possidebant, necnon omnium terrarum censualium quas de elemosina Thoma Escornart diu habuerant, sed et de alterius terre particula in qua quatuor mine sementis possunt seminari, quas idem Simon predictis fratribus Karoliloci post decessum suum in elemosinam contulit, totam similiter decimam absque ulla retentione in bona pace concessimus habendam ac perpetuo possidendam. Statutum est autem et ab utriusque ecclesie nostre videlicet et Karoliloci pro bono pacis et concordie capitulo firmatum quod de omnibus reliquis terris quas in eodem territorio ad presens possident et quas in posterum quoquomodo adquisierint, exceptis de novalibus que ipsos in predicto territorio propriis sumptibus extirpare contigerit, nobis et ecclesie nostre sicut et de aliis ipsius territorii decimam dabunt. Quod ne ulla temporum vel dierum prolixitate a fidelium possit elabi memoria, tam ego Johannes abbas Sancti Vedasti quam abbas Karoliloci Petrus nomine in duabus kartis sub cirographo voluimus scribi et sigillorum nostrorum atque capituli nostri sigillo predictorum etiam abbatum qui ex delegatione capituli Cisterciensis ad hoc missi fuerunt sigillis muniri ac subscriptarum personarum signis et nominibus roborari. Signum Johannis abbatis Sancti Vedasti. S. Petri abbatis Karoliloci. S. Gisleberti abbatis Fusniaci. S. Hugonis abbatis Caricampi. S. Lamberti prioris Sancti Vedasti. S. Henrici subprioris. S. Gilesberti tertii prioris. S. Bartholomei quondam abbatis Sancti Walarici. S. Wimanni thesaurarii. S. Henrici camerarii. S. Hugonis elemosinarii. S. Nicholai cantoris. S. Roberti prepositi Sancti Michaelis. S. Johannis, s. Anscheri, Clementis, Thessonis, Gerrici, Willelmi monachorum. S. Petri, Bernardi, Martini capellanorum. S. Walteri prioris Karoliloci, S. Richardi subprioris. S. Hascelini quondam abbatis Caricampi. S. Willelmi scriptoris. S. Sigeri cellerarii. S. Amalrici de Plailliaco. S. Petri quondam prioris. S. Guifredi magistri novitiorum. S. Balduini de Novavilla. S. Philipi de Colonia. S. Roberti de Falinuirit. S. Radulfi fratris sui et fratris Augustini. Actum anno Verbi incarnati millesimo centesimo octogesimo nono.
Acte inédit. Transcription : B. Tock
copie d'érudit
Paris, BNF, collection Moreau, t. 91, fol. 149-150