Général
-
Ferry (4), duc de Lorraine et marquis
-
Edouard (1), comte de Bar
-
Ferry (4), duc de Lorraine et marquis
-
Edouard (1), comte de Bar
-
Louis (10), roi de France
-
Ferry (4), duc de Lorraine et marquis
-
Edouard (1), comte de Bar
-
-
Bar-sur-Aube
-
FRANCE, Nancy, Archives départementales de Meurthe-et-Moselle, 3 F 475 n° 79 (B)
-
Original sur parchemin, scellé de dix sceaux sur double queue de parchemin (dont huit perdus)
-
français
-
non suspecté
-
Lettre
-
Original
-
Ferry (4), duc de Lorraine, et Edouard (1), comte de Bar, en présence de Louis (10), roi de France, concluent un traité d’alliance contre tous sauf le roi de France, l'empereur et Renaud, évêque de Metz : lorsque l'un des deux princes a besoin de l'autre, celui-ci doit intervenir dans la quinzaine qui suit le mandement avec 100 chevaliers et 3000 hommes de pied ; en cas d'urgence le mandement ne sera pas exigé ; le mandant doit nourrir les hommes de son allié pendant la durée du service et racheter les prisonniers mais il n'est pas tenu d'indemniser les dommages subis. Les deux alliés nommeront chacun deux chevaliers qui auront en charge d'aplanir les difficultés.
-
01. Nous Ferris dus de Lorraine et marchis et nous Eduardz cuens de Bar fasons cognissant a tous que nous par grant deliberation et par nostre grant conceil pour le commun profit de nous, de nos homes fieveis et non fieveis et de nos
02. terres avons fait et fasons aliences ensemble li uns a l'autre pour dureir tenir et gardeir a nos vies entierement en la forme et en la maniere ci aprés escripte; c'est assavoir que li uns de nous doit aidier l'autre contre toute manie-
03. -res de gens et a tous ces besoings et toutes les fois qu'il en cerait requis excepteis et fuer mis nos chiers et ameis signours le roi de France, le roi d'Allemangne et l'empereur c'il i estoit par ensi que se nous dus dessus dis aviens mestier
04. dou dit conte et de son aide nous le deveriens mander a Bar le Duc et il en sa propre persone avec cent homes armeis de fer chevaliers et escuiers ou plux c'il li plasoit et trois mille homes de piei nous doit venir aidier nostre terre
05. a deffendre et chevaulchier avec nous dus nos anemis et doit venir dedens la quinzainne aprés ce que nous l'averiens fait savoir a Bar et autreteil se nous Eduardz cuens de Bar aviens mestier dou dit duc et de son ayde nous
06. li deveriens fare savoir a Nancey et il en sa propre persone nous doit venir aidier nostre terre a deffendre et chevauchier avec nous sus nos anemis a tout autretant de gens et en la maniere que nous le devons aidier se il le nous
07. mandoit; et s'ensi estoit que li uns de nous mandaist a l'autre moins de cent homes armeis de fer et de trois mille homes de piei cil de nous a cui li autres le manderoit ceroit tenus de l'ameneir ce que om l'en manderait dedens
08. le termine qui est acordeis; encor avec ce avons nous promix li uns a l'autre que se besoingz hatif venoit a l'un de nous li autres ceroit tenus de lui aidier a tant de gens comme il porroit avoir bonement sens atendre jour ne
09. mandement fuer mix et exceptei reverent pere Renaut par la grace de Deu evesque de Mes tant com il ceroit evesques contre lequeil li dis dus ne nous est tenus de aidier se il ne li plasoit; ne nous Eduardz ausi ne sommes mie tenus
10. de chevaulchier sor le dit evesque fuers de la duchiei se il nous plasoit tant comme il ceroit evesques mais se li dis evesques ou ses gens venoient en la duchiei pour meffare nous sommes tenus et devons aydier a deffendre
11. la terre de la dite duchiei a tout les cent homes armeis de fer et a tout les trois mille homes de piei ensi comme dessus est dit ou a tout teil pooir de gens com nous porriens avoir bonement se li besoingz estoit hatis
12. ensi com dessus est dit; et se il avenoit que il defaillit dou dit evesque par quoi il ne fut plux evesques en queilque maniere que se fust li uns de nous aideroit et deveroit aidier l'autre contre les evesques de Mes qui
13. aprés venroient et contre les gens de l'eveschiei en nos terres et desuer en la maniere que nous sommes tenu et aliiei encontre toutes aultres gens selonc la convenances et aliences ci dedens escriptes; encor avons promix li uns
14. de nous a l'autre que se nous dus ou cuens dessus dit par tiens dou paix que nous meteriens et estaubliriens home souffisant chascuns de nous pour lui li queilz averoit pooir et feroit pour nous tant com au requestes
15. et au servises dessus dis tout ce que nous feriens et deveriens faire se nous estiens present; et deveroit cil qui fuers dou paix ceroit si tost comme il saveroit le besong de l'autre retorner en l'ayde de l'autre qui werre
16. averoit si tost comme il porroit en bonne foi; et est assavoir que toutes les fois que li uns de nous ou cil qui pour nous ceroit manderoit l'autre ou celui qui pour lui ceroit cil qui mandeis ceroit deveroit venir
17. et venroit a tout le nombre des gens dessus dites ou a teil force comme il porroit avoir bonnement se li besongz estoit hatis ensi com dessus est dit au sien, a ses frais et a ses coustanges jusques a tant que il entreroit
18. en la terre de celui qui mandei l'averoit et quant il i entreroit cil qui mandei l'averoit deveroit a lui et a ses gens pour teil quantitei de gens com il amenroit delivrer pain et vin et grasces chars si com de bues, de pors et de cha-
19. -trons au gens d'armes a chevaul souffisamment et au gens de piei pain souffisamment pour chasun jour tant com il demorroient en son servise et au jours que om ne mangeroit chars se que il i affierroit encor est
20. acordei entre nous que se li uns de nous ou son chief ou ses gens avoient perdes ne damages om servise ou en l'ayde de l'autre si comme de chevaulz, de hernois ou d'aultres chateilz queil que il fussent nulz restors ne s'en feroit ne a l'une
21. partie ne a l'autre ne li uns de nous dous n’en puet ne ne doit riens demender a l'autre fors que des persons des queilz nous acordons se nous dous mandons le dit conte pour nostre ayde et il ou aulcunes de ses gens estoient
22. pris en nostre servise nous ceriens tenus dou delivreir; et en semblant maniere se nous cuens mandiens le dit duc et il ou aulcunes de ses gens estoient pris en nostre servise nous ceriens ausi tenus dou delivreir et
23. se il avenoit que aulcuns qui pris ceroit en nostre servise se delivreit par reanson dou sien cil en cui service il averait estei pris et qui le deveroit ne ceroit tenus de rendre que la valour de ce que la terre le pris en vaulroit
24. par dous ans se tout montoit sa reansons et ses despens souffisamment; en cor avons nous covenanciei et promix nous Eduardz cuens de Bar dessus dis que se il avenoit que nostres chiers oncles Henris sires de Blancmont
25. ou ses hoirs sires de Blancmont eust werre de la queille li dis dus li fut aydens en sa persone et li dus nous requeroit de lui aidier nous aideriens et deveriens aydier en nostre persone a lai requeste dou dit duc le dit
26. signour de Blancmont et sa terre en la maniere que nous avons encovent a aidier le dit duc et sa terre si comme dessus est dit; et se li dis dus empeschies par loaul essonnie ne l'aidoit en sa persone ou il n'estoit am paix nous l'ayderiens
27. et ceriens tenus de l'aidier par home souffisant a la requeste de celui qui ceroit leus tenens le dit duc en la duchiei a tout le nombre des gens d'armes et de piei dessus dites mais nous en nostre persone ni iriens mie se il
28. ne nous plaisoit; encor avons acordei nous dus et cuens dessus dit que nulz de nous ne doit ne ne puet faire alence ne ayde a aultre par quoi li uns de nous ou sa terre en puisse estre grevée se dont n'estoit a ceaulz qui sont
29. exceptei de ceste alience c'est assavoir au roi de France, au roi d'Alemangne ou a l'emperour se il i estoit; encor avons acordei nous dus et cuens dessus dit que ce il avenoit que nous ensemble meffeissiens sus aucuns de nos
30. anemis cil de nous dous qui chiés ceroit de la werre ne porroit fare paix ne treve a ceaulz cui li damage ceroient fait que cil qui ceroit aidens ne fut de la paix ou de la treve et ses gens ausi; encor avons promix par nos saremens
31. li uns a l'autre a tenir et faire tenir nos terres et nos subgis en paix par quoi comtemps ne puisse movoir entre nous a nulz jours de nos vies; et pour ce mielz fare et acomplir devons nous estaublir et estaublirons quatre chevaliers c'est assa-
32. -voir chacuns de nous dous qui averont pooir par lettres donées li uns a l'autre de par nous de termineir et de mettre a fin tous descors, debas et entreprises qui avenir porroient en nos dites terres les queilz chevaliers chacuns de
33. nous porrait remueir les siens et mettre aultres toutes les fois que il li plarait liqueil dit chevalier doient cranteir par lor fois et jureir sor saintes euwangiles quant nous les estaublirons que il en bonne foi et selonc rason au plux pres que il
34. porront, termineront et meteront a fin tous debas et descors de nos dites terres sens emport de partie; encor avons acordei et acordons que nulz de nos prevos, de nos sergens ne de nos gens de poestei ne pannissent ne gaigent en la terre
35. de l'autre pour queille cause que ce soit ains en requeroient uns aus aultres amiablement et fascent rason et cil qui aultrement le ferait fut prevos ou sergens ou homs de poestei il renderait tous coustz et tous damages au double
36. dou sien propre et se il n'avoit le pooir dou paier il cerait envoiés en la prison dou signour sor cui il averoit panni ou gagiei tant qu'il averoit fait satisfaction dou dit double ne ne volons que nul bailli de nos terres dongnent
37. congiei ne licence de pannir ne de gagier ne que li dit bailli puissent pannir ne gagier en nos dites terres pour queille cause que se soit mais requeroient li uns baillis a l'autre amiablement et fascent fare rason de lor subgis
38. dedens la quinzaine que il en ceront requis; et se aulcuns des dis baillis en estoit defaillans ou negligens li aultres baillis qui requis l'averoit en iroit ou envoeroit au dous chevaliers estaublis de par le signour de cui
39. terre li baillis ceroit defaillans ou a l'un d'eaulz li queil dui chevaliers ou li uns d'eaulz en feroient fare rason et coustume de paix dedens un moix aprés ce que il en ceroient requis et ceroient li dit chevalier ou li uns d'eaulz au des-
40. -pens et au frais dou bailli qui ceroit troveis negligens ou defaillans de rason fare et li feroient paier les damages de la partie et ausi pugniroient il prevos, sergens et gens de poestei en la forme et en la maniere dessus dite;
41. et se il avenoit que nous ou lit dit chevalier ne feissiens fare rason ensi com dessus est dit nous nous consentons et ad ce nous obligons que trés haulz et trés excellans princes nostres chiers et redouteis sires li rois de France envoisce
42. au leus des descors au despens et au coustanges de celui de nous qui ceroit troveis en tort et les fasce defare et adrecier selonc rason et coustume de paix toutes fois que il en cerait requis dou plaintif ou sens plainte
43. toutes celles fois qu'il saveroit que descors ceroit entre nous; encor avons acordei et acordons que tous li acors fais entre nous duc et conte dessus dis a Bar sor Aube en la presence de trés excellant prince nostre dit
44. trés chier signour le roi de France adonques roi de Navarre se tengne et que il soit et demoroit a sa vertu avec ces aliences et covenances seans escriptes; et nous dus et cuens dessus dit avons promix li uns a l'autre et prometons par la foi de
45. nos cors et par les saremens solempneis donneis de nous sor saintes ewangiles l'un en presence de l'autre et en la presence de plusours de nos bons amis et de nostre conceil a tenir et a gardeir toutes les choses et covenances dessus dites
46. et chascune d'elles entierement sens aleir ne fare aleir encontre de riens par nous ne par aultre en appart nei en recoi sens guerre, fraude n'en eschui par quoi nous puissiens de riens enfraindre ne fare enfreindre les choses dessus dites
47. ne aulcune d'icelles et volons et ottroons que cil de nous qui de riens iroit ou feroit aleir encontre les choses dessus dites ou aulcune d'elles fut tenus pour foi mantié et pour parjurs et teilz ceroit il et quant ad ce fare a tenir et a
48. acomplir fermement nous obligons li uns a l'autre avec les obligations dessus dites tous nos biens mobles et non mobles presens et a venir ou que il soient om roaume de France et defuer; et encor pour plux grant sceurtei a avoir et pour
49. mielz tenir et gardeir toutes les choses et convenances dessus dites et chascune d'elles avons nous dus et cuens dessus dit suppliiei et supplions a grant instance, a trés excellent prince nostre dit chier et redoutei signour le roi
50. de France que il toutes les choses et covenances dessus dites et chacune d'elles weuille loeir, greeir et confermeir et que il les nous fasce tenir comme sires par sa grant force au coustz et au despens de celui de nous qui seroit troveis
51. en tort et en deffaut; et quant ad ce fare tenir et acomplir nous dus et cuens dessus dit obligons au dit roi nostre trés chier signour tous les fiés et les heritages que nous tenons de lui les queilz il tenroit en sa main et ou l'ave-
52. -roit et esploiteroit toutes issues et profis jusques a tant que il averoit rendu et fait rendre a cil de nous tous coustz et damages que il averoit eu et encorru par deffaut et negligence de l'autre et jusques ad ce ausi
53. que nostres dis sires li rois averoit en plainne satisfation de tous cousts et damages que il et ses gens averoient eu en pourchassant a fare tenir les choses et covenances dessus dites et chacune d'elles des queilz dis
54. coustz, damages et restaublissemens nous volons que nostres dis sires li rois de France soit creus de ce que il en volrait ordeneir; et toutes les fois que cil qui le deffaut ou la negligence averoit fait voulroit
55. fare asseis et feroit a celui qui les damages et coustanges averoit eus et receus et au dit nostre signour le roi de France des frais et des coustanges qu'il ou ses gens averoient fait il revenroit sens debat a son herita-
56. -ge; et avons renunciei et renunsons nous dus et cuens dessus dit en cest fait par la foi de nos cors et sor les saremens dessus dis et sor l'onour et l'estat de nos persones ad ce que nous ne aultres pour nous puissiens dire
57. ne fare dire en jugement ne dehors nous estre deceus en choses, covenances et aliences dessus dites en tout nei en partie a l'exception de restitution pour cause de manre aage a toutes allegations, exceptions, privileges doneis
58. et a donneir a toute ayde, de loi et de canon au benefice de la croix et generaulment a tout ce de droit, de fait et de coustume par les queilz om porroit aleir contre les dites choses, covenances et aliences ou
59. aulcune d'elles. En tesmongnage des queilz choses et pour ce que fermes soients estaubles et duraubles a nos dites vies avons-nous dus et cuens dessus dit fait seeller ces presentes lettres de nos seeilz et encor
60. pour plux grant sceurtei a avoir des dites choses avons nous, Ferris dus dessus dis, priei et requis a nobles homes nos ameis et feaubles monsignour Jehan de Baon, monsignour Brunique de Riche, monsignour Piere de
61. Haraucourt et monsignour Liebaut de Rosieres chevaliers, et nous Eduardz cuens dessus dis avons ausi priei et requis a nobles homes nos ameis et feaubles monsignour Erard de Bar, signour de Pierpont nostre oncle, monsignour
62. Anceil de Jeinville, signour de Rinel, monsigour Wautier, signour de Beffroimont et monsignour Piere de Narcei signour de Chancenai chevaliers que il en tesmongnage de veritei mettent lor seeilz avec les nostres
63. en ces presentes lettres et nous Jehans de Baon, Bruniques de Riche, Pieres de Haraucourt, Liebaus de Rosieres chevaliers dessus dit a la priere et requeste de haut home noble et puissant nostre chier et amei signour Ferri
64. duc de Lorrainne et marchis dessus dit, et nous Erardz de Bar, Anciaulz de Jeinville, Wautier sires de Beffroimont et Pieres de Narcei chevalier dessus dit a la priere et requeste de haut home noble et puissant nostre
65. chier et amei signour Eduard conte de Bar dessus dit avons mis nos seeilz avec les lor seeilz en tesmongnage de veritei en ces presentes lettres que furent faites et données l'an de grace mil trois cens et quinze
66. om mois de junet lou mardi aprés mois de la Penthecouste. -
« Vidimus des echances de mo(n)sign(our) lou duc et dou cuen de Bar », XIVe s. « Qui saiel lou roy de France », « Narration », XVe s. ; « Coll. Lorraine n° 251. / 3 F 475 », « Fons Vienne. / Layette Traités III, n° 79 »XIXe-XXe s.
-
J. BRIDOT, Catalogue des actes de Ferry IV, Duc de Lorraine (1312-1329) , Nancy, Bibliothèque municipale de Nancy (copie dactylographiée du diplôme d’études supérieures soutenu devant la Faculté des Lettres de Nancy), 1949, n° 126
-
B. PICARD, L’origine de la très illustre maison de Lorraine, Toul, 1704, p. 327
-
A. CALMET, Histoire ecclesiastique et civile de Lorraine qui comprend ce qui s’est passé de plus memorable dans l’Archevêché de Tréves, & dans les Evêchez de Metz, Toul et Verdun, depuis l’entrée de Jules César dans la Gaulle, jusqu’à la mort de Charles V, duc de Lorraine, arrivé en 1690. Avec les pièces justificatives à la fin. Le tout enrichi de cartes Georgraphiques, de Plan de Villes & d’Eglises, de Sceaux, de Monnoyes, de Medailles, de Monumens, &c., […] tome II, Nancy, 1728. col. 446-4447 (t. II) et col. 225 (t. III)
-
A. DIGOT, Histoire de Lorraine, Nancy, 1880 (2e éd.), p. 212 (t. II)
-
J. SIMONNET, Essai sur l’histoire et la généalogie des sires de Joinvilles (1008-1386), 1876, p. 239 et 335
-
L. GERMAIN, Fragments d’études historiques sur le comté de Vaudémont. Ancel de Joinville , in « Mémoires de la Société d’Archéologie Lorraine », 1884, p. 225-258, cat., n° 12, p. 241
-
H.-F. DELABORDE, Jean de Joinville et les seigneurs de Joinville, Paris, 1894, n° 749, p. 413
-
L. QUINTARD, Bayon et ses seigneurs, Nancy 1900, p. 12
-
H. LEVALLOIS, table chronologique provisoire des actes des ducs Thiébaut II et Ferry IV conservés dans le Trésor des chartes de Lorraine ou publiés et analysé, Nancy, Bibliothèque municipale, ms. 1185 (4 et 5)
-
M. FRANÇOIS, Histoire des comtes et du comté de Vaudémont, Nancy, 1935, p. 129
-
[Vidimus] FRANCE, Nancy, Archives départementales de Meurthe-et-Moselle, 3 F 475 n° 79 (vidimus de Louis X roi de France)
-
[Copie] FRANCE, Paris, Bibliothèque nationale de France, Provinces françaises, Collection de Lorraine, vol. 718, f° 63 et 64 (copie du XIVe s.)
-
[Copie] FRANCE, Nancy, Archives départementales de Meurthe-et-Moselle, ms. 325 de la Société d’Archéologie lorraine, f° 40-43 (copie du XVIe s.)
-
Laura Gili-Thébaudeau
Sigillographie
-
oui
-
Plusieurs sceaux sur double queue.
Informations
Acte
Laura
Gili-Thébaudeau
(Université de Lorraine), dans
TRANSSCRIPT
TRANSSCRIPT Project. Writing and Governance. Cultural transfers between France and the Empire (13th-16th centuries), dir. I. Guyot-Bachy (CRULH) et M. Margue (IPSE), éd. électronique TELMA (IRHT), Orléans, 2017 [en ligne], acte n. 23686 (transscript-511), http://telma.irht.cnrs.fr/chartes/transscript/notice/23686 (mise à jour : 20/11/2018).