CONFIRME LA CESSION à SON PROFIT, PAR MANASSÈS, COMTE DE RETHEL, DE L'ÉGLISE SAINT PIERRE DE MÉZIÈRES
Villermus, Dei gratia, Remorum archiepiscopus, Apostolice Sedis legatus, omnibus tam futuris quam presentibus in perpetuum. Quoniam rerum gestarum memoriam dampnosa confundit oblivio, litteris annotari precepimus quod Manasses, comes Regitestensis, cum assensu uxoris sue Mathildis, et Alberti, Henrici, Balduyni, fratrum suorum, capellam suam de Maceriis, in honore beati Petri apostoli fundatam, liberam nobis resignavit, ut in ea tredecim prebende canonicis secularibus assignate constituantur, quibus, pro salute anime sue et predecessorum suorum, tredecim modios annone, medietatem frumenti et medietatem siliginis, annuatim persolvendos omni tempore, in festivitate sancti Remigii, de terragiis ville que dicitur Tannion, ad mensuram ejusdem ville, coram bonis (sic) assignavit. Preterea quicquid de feodo suo vel potestate sua emere vel redimere seu quolibet modo acquirere poterint, libere et quiete illis possidendum concessit. Nos quoque eisdem canonicis altare Sancti Marcelli cum capella de Viller sibi adjacente, et altare Sancti Remigii de Reomonte, libere et quiete imperpetuum possidenda concessimus. Predictarum etiam prebendarum donationem decano quem ibi constituimus, et capitulo ejusdem ecclesie concessimus, et insuper eisdem indulsimus ut habitum in eadem ecclesia, tam tempore hyemali quam estivali, deferre valeant atque possint ad instar ecclesie Remensis. Cum vero decanus de medio exemptus fuerit, ille, qui de communi assensu capituli electus fuerit, nobis presentabitur, a nobis, si ipsa electio canonica fuerit, confirmandus, et sic confirmatus, nobis hominium faciet. Statuta etiam per eos facta cum universis que juste et canonice ipsis collata, vel ab eisdem rationabiliter adquisita fuerint, presentis scripti attestatione et sigilli nostri auctoritate confirmamus; statuentes et sub anathematis sententia inhibentes ne quis libertatem sive jura prememoratorum canonicorum infringere, vel statum eorum in alium transmutare, seu possessiones eorum violenter aufferre, seu donationi vel institutioni nostre ausu temerario obviare presumat, salva tamen in omnibus Sedis Apostolice auctoritate, si aliquomodo interveniat. - Actum apud Attigniacum, anno ab Incarnatione Domini millesimo centesimo septuagesimo sexto, XVI kalendas octobris, astantibus nobis Bosone, archidiacono, Hildewino, vicedomino, Alexandro Walensi, Henrico, nepote domini Willermi Papiensis, magistro Milone Pisano, Hugone de Montemirabili, Philippo de Beliguivilla, Fulcone de Sancto Remigio, Tecelino, abbate de Mare, Juliano, abbate de Thin; militibus: Biliardo, castellano de Alto Ulmo, Gosberto, fratre ejus, de Suel, Milone de Sorceyo, Simone Pede Lupi, Herberto Aysiaco, Nicolao de Burgo et aliis pluribus.
SAIGE (Gustave) et LACAILLE (Henri), Trésor des chartes du comté de Rethel, t. 1, Monaco, 1902, n° 8, p. 17-18