Accord par devant le comte de Pontieu entre Girart Cardun d'Argoules et les frères de l'église de Balances.
Ego Willelmus, Dei patientia comes Pontivi, fidelibus universis in perpetuum. Notum facio tam presentibus quam futuris quod Girardus Carduns de Argovia me presente recognovit quod omnes querelas, quas vel ipse vel antecessores ejus moverant quocumque modo, sive reclamabant, contra ecclesiam et fratres de Balanciis, in pace et quiete dimisit, et quicquid eum de jure contingebat in toto territorio Argovie et omni genere possessionis ab ecclesia Argovie usque ad pontem de Pratellis, sub via que ab Argovia versus Pratellos protenditur, concedente uxore sua Erenburge, dedit et confirmavit, ac super altare in elemosinam coram conventu in abbatia Balanciarum posuit, et in his omnibus guarandiam et defensionem pro viribus ad petitionem et voluntatem abbatis et fratrum feret. Homagium autem de quarta parte terre que jacet super murum abbatie, secus viam que ducit ad Mosultram, dimisit ei abbas et conventus, et ipse nichilominus guarandiam et acquietationem terre ejusdem, quam ei pepigerant, eis perpetualiter remisit. Itaque pro his omnibus LX solidos de caritate domus ei dederunt. Ortum quoque, quem vir bone memorie, Hugo abbas, ei dederat, Stephanus abbas, concedente conventu, concessit, tali pactione quod, si contigerit ut quartam partem Argovie, quam prefata ecclesia obtinuit a Radulfo de Hupi, heredi ejus reddiderint, Girardus vel heres ejus feodum suum sequetur, nec de guarandia nec aliunde abbatiam requiret, sed omnis ecclesie possessio in pace remanebit. Sepulturam etiam tam ipsi quam suis heredibus maribus tantum, si viventes petierint et catholice sepeliri meruerint, concesserunt ei fratres. Facta sunt hec et recognita in hospitio abbatie prenominate, que ad petitionem ipsius Girardi carte mandari, ut rata et illibata permaneant, cartam eamdem sigillo meo imprimi, ac fratribus in testimonium dari precepi, presentibus subscriptis testibus. Ego Willelmus, comes Pontivi, sum testis, et, tanquam advocatus ipsius ecclesie, facere teneor ut inviolabiliter teneantur; Engelrannus senescallus testis est; Guido, patruus meus; Robertus de Argovia, de quo feodum suum tenet qui hoc idem concessit; Petrus de Rua; Rainelmus Rabos; Guido de Toflait; Silvester, clericus meus; Landricus de Moncellis. Anno Domini Mº Cº XCº IIIº, IIIIº kl. aprilis.
BRUNEL (Clovis), Recueil des actes des comtes de Pontieu (1026-1279), Paris, 1930, n° 130, p. 196-198