Ego Theobaldus, Dei miseratione Ambianensis dictus episcopus, tam presentibus quam futuris notam facio conventionem inter dilectos filios nostros canonicos matris ecclesie Ambianensis et Gregorium de Marcel de communi assensu factam que sic est : Per totum territorium de Fontenelles ecclesia Ambianensis totam decimam habet et medietatem terragii. Porro predictus Gregorius qui in eodem territorio quartam partem terragii habet, cum de communi territorio quod ad homines ecclesie de Duri ad agricolandum pertinet quosdam campos emisset, et terre que de agricultura sua erat eam adjungere vellet, ut pace ecclesie nostre eam teneret, assensu Eustachii de Rumeni de quo ipse tenebat, concessit et pepigit se vel heredem suum nichil in territorio illo deinceps empturos. Siquidem terram illam propria carruca, si voluerit, excolet ; sin autem cuicumque voluerit de hominibus ecclesie ad utilitatem suam ad excolendum tribuet, salvo redditu ecclesie nostre in eadem terra sicut in reliqua. Redditum suum Ambianis, sive apud Duri, ubi ipse Gregorius maluerit, homines ecclesie qui eam excolent propriis vehiculis adducent. Forisfactum suum jam dictus Gregorius apud Duri et non alibi absque contradictione adducet, et secundum consuetudinem et legem a decano et a capitulo ibi contitutam libere et integre accipiet, nisi gratis remissionem facere voluerit.
Actum est hoc anno Mº Cº LXXº Iº, Radulpho tunc temporis decano, Willelmo preposito, Guarino, Ingelranno archidiaconis, Roberto cancellario, Guifrido presbytero, Symone cellerario.
Cartulaire du chapitre de la cathédrale d'Amiens, t. 1, Amiens, 1905 (Mémoires de la société des antiquaires de Picardie; Documents inédits concernant la province, 14), n° 49, p. 67-68
cartulaire
Amiens, AD Somme, 4 G 2966 (« cartulaire I » du chapitre cathédral d’Amiens),