Jean Ier, évêque de Thérouanne, autorise la transformation de l'église de Ruisseauville en abbaye, et confirme qu'elle suivra désormais les usages d'Arrouaise et que l'abbé sera choisi parmi les chanoines de Ruisseauville ou parmi ceux d'Arrouaise.
(Crux) In nomine Patris et Filii et Spiritus Sancti. Ego I[ohannes], Dei miseratione Morinorum episcopus, omnibus sancte matris ecclesie catholice filiis, tam presentibus quam futuris notum fieri uolo quod in sequentibus continetur. Cum ecclesiam que dicitur Sancte Marie de Nemore domno G[eruasio] abbati ecclesie Sancti Nicholai de Aridagamantia quasi cellam regendam ac disponendam, nostrorum consensu clericorum, sub priuilegii astipulatione tradidissemus, idem abbas, diuina aspirante gratia, ad cultum canonici ordinis amplificandum et onus pastoralis sue sollicitudinis releuandum, abbatem in eodem loco de suo monasterio electum nobis et huic sancte sedi canonice obediturum ordinari uoluit, et capituli sui assensu rogauit. Cuius profecto pie uoluntati eo tenore assensum prebere decreuimus, quatinus idem abbas instituta et consuetudines ecclesie Sancti Nicholai de qua electus est integre et obedienter custodiat, et a subditis suis futuris temporibus custodiri faciat. Qui si forte, quod absit, in crastinum aliqua ductus leuitate, propositi rigorem ordinis postponere et Christi quam professus est paupertatem contempnere ac remissius agere uoluerit, secundo tercioue a prenominati monasterii abbate commonitus, nisi mores suos ad dispositionem eius competenti satisfactione correxerit, ab obedientia sibi imposita absolutus, ad claustrum suum redire et in ordine suo ibidem Deo seruire cogatur, et alius regimini domus Dei idoneus predicti abbatis dispositione et consilio substituatur. Cum autem ab hoc seculo migrauerit, uel forte domus sue regimen aliqua occasione deseruerit, in eodem loco si dignus inueniri potuerit, uel de sepedicto Sancti Nicholai monasterio successor ei secundum abbatis consilium electus ordinetur. Si qua sane in posterum ecclesiastica secularisue persona, hanc nostri instituti paginam sciens, contra eam temere uenire temptauerit, si non congrua satisfactione emendauerit, excommunicationi subiaceat. Actum Taruenne anno Domini M°C°XXVII° indictione VIta, pridie idus iunii. His testibus Herberto, Gualtero archidiaconis, Gozelino decano, Gualtero custode, Meinero, Philippo cantore, Milone magistro, Erembaldo, Hermanno, Euerardo, Cunone, Gualtero, Lamberto.
TOCK (Benoît-Michel) et MILIS (Ludo), Monumenta Arroasiensia, Turnhout, 2000 (Corpus Christianorum, Continuatio Mediaevalis, 175), n° 13, p. 60-62