MISSION AUPRÈS DU PAPE DONNÉE A HIÉRÉMIAS, ARCHEVÊQUE DE SENS, ET A JONAS, ÉVÊQUE D’ORLÉANS, PAR LOUIS-LE-DÉBONNAIRE.
L’empereur envoie les deux prélats auprès du pape Eugène II, avec les décrets du concile de Paris relatifs aux images, et leur donne des instructions sur cette affaire qui était alors vivement débattue par l’église grecque.
Hieremiæ et Jonæ venerabilibus episcopis in Domino salutem. Venerunt ad præsentiam nostram Halitgarius et Amalatius episcopi, VIII idus decembris, deferentes collectiones de libris sanctorum patrum, quas in conventu apud Parisios habito simul positi collegistis, quas etiam coram nobis perlegi fecimus. Et quia placuerunt, et ad id, propter quod collectæ sunt, necessariæ atque utiles a nobis judicantur, sub omni celeritate censuimus dirigendas. Idcirco admonendo præcipimus solertiæ vestræ ut, priusquam de his aliquid domno apostolico indicetis, diligenti cura eadem vos recensere curetis, et ea, quæ melius et aptius præsenti negotio convenire inveneritis, excerpere atque describere, illique ad legendum offerre studeatis. Quia enim, ut nostris, nos ab eo petere voluimus licentiam, quatenus has collectiones a sacerdotibus nostris fieri permitteret, ideo non poterit prætermitti, quin ostendatur quod ex ipsius permissione collectum est. Illud tamen summopere prævidete, ut ea illa de his ostendatis, quæ rationi de imaginibus habendæ per omnia conveniant, et quod ipse vel sui rejicere minime valeant: sed et vos ipsi tam patienter ac modeste cum eo de hac causa disputationem habeatis, ut summopere caveatis ne nimis ei resistendo, eum in aliquam irrevocabilem pertinaciam incidere compellatis; sed paulatim, verbis ejus quasi obsequendo magis quam aperte resistendo, ad mensuram, quæ in habendis imaginibus retinenda est, eum deducere valeatis; et ideo potius efficere contendatis ut negotium, de quo agitur, ad meliorem quam ad pejorem statum cum Dei adjutorio perducatur. Postquam vero hanc rationem de earumdem imaginum causa consummaveritis, si tamen hoc ad nihilum romana pertinacia permiserit, ut ratio inter vos habita aliquo bono et convenienti fine claudatur, et ille vobis indicaverit quod legatos suos ob eamdem causam in Græciam mittere velit, volumus ut eum interrogetis, si ei placeat ut nostri legati pariter cum suis in Græciam pergant. Et si hoc ei melius visum fuerit, seque omnino velle responderit, tunc volumus ut sub omni festinatione litteris vestris a vobis ad nos directis, nos inde certos faciatis, simulque et de vestro adventu ad nos; ut eo tempore, quo vos ad nostram veneritis præsentiam, Halilgarium et Amalarium nobiscum inveniatis. Vos autem cum domno apostolico considerate, ubi ille vel quando velit ut sui ac nostri legati ad naves conscendendas se jungere debeant; et hoc nobis per vosmetipsos, cum Deo volente veneritis, adnuntiare potestis.
QUANTIN (Maximilien), Cartulaire général de l'Yonne, Recueil de documents authentiques pour servir à l'histoire des pays qui forment ce département, publié par la Société des sciences historiques et naturelles de l'Yonne, Auxerre, Perriquet, 1854-1860, tome 1, p. , n° XVIII.
imprimé
Recueil des Hist. Des Gaules et de France, t. VI, 341