CHARTA QUA DURANNUS ET UXOR EJUS WALBURGA VENDUNT AMBLARDO, LUGDUNENSI ARCHIEPISCOPO, RES SUAS IN PAGO ARVERNICO.
Durantius et Waltburga son épouse vendent à Amblardus, archevêque de Lyon, des biens situés dans les villae Nimsago, Ledraco, et alii, au pagus d'Auvergne.
Dilecto in Christo fratri Amblardo, Lugdunensis ecclesiæ archiepiscopo. Nos quidem, ego, in Dei nomine, Durantius et uxor mea, nomine Waltburga, pariter venditores, vendimus tibi aliquid de rebus nostris quæ sunt sitæ in pago Alvernico, in agro Tiernensi, in vicaria Doratensi, in villa que dicitur Nimsago, et in alio loco qui dicitur Augereta, et in alio loco qui dicitur Mons Brisonis, et in alio loco qui dicitur Arlatio. Et in vicaria Lodosense similiter vendimus tibi villam que dicitur Ledraco; similiter et alio loco qui dicitur Calomna, et in alio loco qui dicitur Foliosa, et in alio loco qui dicitur Arnogole. Quantum infra istas res nos per legitimum hereditatem advenire legibus debet, usque inexquisitum, totum ad integrum tibi vendimus, cum pratis, campis, vineis, silvis, agris, agescenciis, cultis sive incultis, atque mancipiis nostris, totum ad integrum pariter tibi vendimus atque transfundimus, et accepimus a te precium sive in terra, sive in aliis rebus conpreciatis solidos CC, in ea ratione ut facias post hac die quicquid facere volueris, habendi, tenendi, vendendi vel possidendi, seu scilicet commutandi vel quicquid facere volueris faciendi facias. Si quis vero, si nos ipsi, aut ullus de heredibus nostris, aut ulla [e]missa persona, quæ contra hanc venditionem aliquam calumniam inferre voluerit, nullatenus vindicet; sed inferat tibi, vel cui litem intulerit, tantum et alium tantum quantum predicte res eo tempore et meliorate valuerint, et inantea hec venditio firma et stabilis permanere firma permaneat, cum stipulatione subnixa. Noverint omnes tam presentes quam futuri, tam pro ista pretia quam pro ista terra, donavit Am[b]lardus Durando pro benefacto terram. Signum Duranni et uxoris Walburge, qui istam cartam scribere vel firmare rogaverunt. S. Eldini. S. Iterii. S. Geraldi. S. Dalmatii. S. Bertranni. S. Austorgii. S. Constancii, dictavit die mercurii, in mense januario, tertio idus, anno ab incarnatione Domini nongentesimo sexagesimo, regnante Gundrado rege anno XXV. Fidem fecerunt Constantinus et Eldinus pro ista carta, quæ firma permaneat.
BERNARD A., BRUEL A., Recueil des chartes de l'abbaye de Cluny. Tome 2 : 954-987, Paris, Imprimerie nationale, 1880, p. 172-173, n° 1078 (Collection de documents inédits sur l'histoire de France. Première série, Histoire politique).
cartulaire
Paris, BNF, n.a. lat. 1497, cartulaire A, chartes de l'abbé Maieul, p. 4.