CHARTA QUA GOTEFREDUS DAT MONASTERIO CLUNIACENSI MANSUM CUM BOSCO ET VINEAM PRATUMQUE IN VILLA CURCIACO.
Gotdefredus donne à l'abbaye de Cluny des manses, une vigne et un pré situés dans la villa Curciaco, au pagus de Mâcon.
In nomine Verbi incarnati. Notum sit omnibus in cadrifidis mundi partibus consistentibus, quod ego, in Dei nomine, Gotefredus dono Domino Deo et ejus sanctis apostolis Petro et Paulo ad locum Cluniacum, ubi domnus Odilo abbas reverentissimus preesse videtur, aliquid de mea hereditate que sita est in pago Matisconense, hoc est unum mansum situm in villa Curciaco, cum bosco similiter simul tenente; et terminat a mane ipso bosco, a medio die et a sero via publica, a cercio de ipsa hereditate. In ipso loco juxta ipsum mansum, via intermedia, dono etiam vineam unam, que terminat a mane via publica, a medio die terra Meingodi, a sero via publica usque a rivo currente, a cercio terra Gausberti. Infra istas terminationes, omnia quicquid habere videor dono pro anime mee remedio Sancto Petro, cum uno prato qui est juxta ipsum locum situs, qui terminat a mane volvente rivo, a medio die et a sero et a certio terra Maingodi. Facio autem in tali conventu, ut faciant de his quicquid voluerint. S. Gotefredi, qui hanc cartam fieri jussit. S. Constantii presbiteri.
BERNARD A., BRUEL A., Recueil des chartes de l'abbaye de Cluny. Tome 3 : 987-1027, Paris, Imprimerie nationale, 1884, p. 197-198, n° 1985 (Collection de documents inédits sur l'histoire de France. Première série, Histoire politique).