B. decanus Beati Stephani Trecensis omnibus presentes litteras inspecturis, salutem in Domino. Noveritis quod cum causa verteretur, auctoritate Apostolica, coram viris venerabilibus M. decano et H. cantore Trecensibus, judicibus a domino Papa delegatis inter abbatissam et conventum Beate Marie Trecensis ex una parte, et Ferricum presbiterum Sancti Johannis in Foro Trecensis, ex altera, super quadam parte annue pensionis LXX librarum pro dicta ecclesia Sancti Johannis sibi debite, in cujus videlicet partis solutione ipsum se defecisse dicebant. Tandem partes coram judicibus pro tribunali sedentibus, de consilio bonorum virorum et predictorum judicum, super dicta querela composuerunt amicabiliter in hunc modum, quod jam dictus presbiter de XXX libris nove monete, et VII libris de veteri, sine contradictione debitis et recognitis, talem solutionem et talibus terminis, se facturum, super sancta juravit: videlicet quartam partem predictorum librarum solvet in proximis nundinis Trecensibus Sancti Remigii; quartam partem in primis nundinis Langniaci; quartam partem in sequentibus nundinis Barri; et quartam partem in sequentibus nundinis Trecensibus Sancti Johannis; septem libris de veteri moneta predictis ei quitatis. Preterea pensionem predictam LXX librarum, debito modo et terminis solitis, se deinceps soluturum, similiter super sancta juravit, ecclesia predicta Sancti Johannis in suo statu videlicet sine divisione manente; alioquin si divisa fuerit, pro portione apud ipsum remanente solvet portionem pensionis predicte. Pro mense autem presenti, scilicet septembri, et pro sequenti, scilicet octobri, infra octavas Omnium Sanctorum, solvet XII libras monialibus. Pro mense vero martio preterito, vel solutionem factam legitime probabit, vel pro dicto mense solutionem faciet terminis prenotatis. Quia presens interfui dicte compositioni et juramento prestito, in hujus rei memoriam presentes litteras ad petitionem dictarum abbatisse et conventus scribi feci sigillo meo signatas.
Actum anno M° CCº XX° quinto, mense septembri.
LALORE, Documents sur l'abbaye de Notre-Dame-aux-Nonnains de Troyes, 1147-1590, dans Mémoires de la société académique de l'Aube, 3e ser., 11 (1874), n° 144, p. 95-96