Ego Petrus de Curteriaco notum facio omnibus, tam presentibus quam futuris, quod donavi ecclesie Paracliti unum modium bladi, VI sextarios frumenti et VI avene, in decima de Murmant, ad ejusdem ville mensuram, in perpetuum possidendum, tali tenore, quod filia mea Helovisa, monialis predicte ecclesie, illum modium in vita sua acciperet ad voluntatem suam faciendam, post ejus vero decessum obitus meus annotabitur et conventus de prehabito modio in die mei obitus plenarium habebit refectionem, his testibus: Milone, fratre meo; Milone, filio meo; domino Symone de Nunroi; Theobaldo, filio suo. Hoc uxor mea G., et M., filius meus, et Anselmus, et Fraherius, et Garinus, et Milo, frater meus, laudaverunt.
LALORE, Cartulaire du Paraclet, 1878 (Collection des principaux cartulaires du diocèse de Troyes, 2), n° 134, p. 145