Le pape Innocent III accorde à l'abbaye de Bergues la faculté de retenir les fiefs qui lui sont engagés et d'en percevoir les fruits
Innocentius episcopus, servus servorum Dei, dilectis filiis abbati et conventui Bergensi salutem et apostolicam benedictionem. Solet annuere sedes apostolica piis votis et honestis precibus favorem benivolum impertiri. Eapropter, dilecti in Domino filii, vestris justis precibus justo concurrentes assensu, auctoritate vobis presentium indulgemus ut terras et redditus qui de feudo monasterii vestri consistunt ab eorum possessoribus titulo vobis pignoris obligatos vel etiam imposterum obligandos, ipsorum fructibus non computatis, in sortem libere retinere possitis, ita videlicet ut quamdiu fructus illos perceperitis in sortem minime computandos iidem feudatarii a servitiis in quibus vobis et monasterio vestro pro feudis ipsis tenentur interim sint immunes. Nulli ergo omnino hominum liceat hanc paginam nostre concessionis infringere, vel ei ausu temerario contraire. Si quis autem hoc attemptare presumpserit, indignationem omnipotentis Dei et beatorum Petri et Pauli apostolorum ejus se noverit incursurum. Datum Lateranen. V idus februarii, pontificatus nostri anno octavo decimo.
PRUVOST (Alexandre), Chronique et cartulaire de l'abbaye de Bergues-Saint-Winoc, t. 1, Bruges, 1875, p. 193-194