Le prévôt Jean, le doyen Jean et tout le chapitre cathédral d'Arras arbitrent le différend qui oppose à l'évêque d'Arras Pierre le chapitre Saint-Amé de Douai au sujet du droit de gîte.
Johannes prepositus, Johannes decanus cum universo Atrebatensis ecclesie capitulo, universis tam futuris quam presentibus in perpetuum. Cum inter dominum nostrum Petrum Atrebatensem episcopum et dilectos nostros canonicos sancti Amati Duacensis super procuratione quam ipse dominus episcopus ab eis sibi annis singulis postulabat exhiberi questio verteretur, nos ad componendum inter eos operam studiosius adhibentes de ipsorum pari consensu et nostro formam pacis ordinavimus in hunc modum. Due sunt in ecclesia beati Amati Duacensis preclare sollempnitates quas canonici cultu celebriore venerantur, una beati Mauronti abbatis V die maii, altera beati Amati in crastino beati Luce Evangeliste. Harum alterutram si voluerit eliget Atrebatensis episcopus ut ad ecclesiam Duacensem accedat majoris misse sollempnia celebraturus, nisi aliquid rationabiliter obstiterit quominus ea valeat celebrare. Ipsa autem ecclesia in aliqua domorum claustralium, quamcumque episcopus voluerit, honestum providens hospicium, duas marchas ad pondus flandrense pro ipso ibidem procurando ei liberaliter providebit et si bonum fuerit in oculis episcopi ut in vigilia ipsius festi vel nocte sequenti apud eos pernoctet, pro nocte illa canonici marcham terciam superaddent. Nulla tamen necessitate astringetur quin ad illam ecclesiam sicut ad alias sui episcopatus ecclesias quotienscumque voluerit possit accedere, nichil tamen procurationis nomine preter id quod dictum est et sicut dictum est ab ipsis canonicis annis singulis exacturus. Hoc autem diximus non esse sub silentio transeundum quod sub procuratione prescripta procurationem illam non includimus que ipsi episcopo cum primo post consecrationem suam ad illam accesserit tam debet quam solet sollempniter exhiberi. Si autem in prescriptis sollempnitatibus ecclesiam illam a divinis contigerit esse suspensam et episcopus ad eam juxta modum qui dictus est accesserit, quod supra ordinatum est ei nichilominus exolvetur. Hanc pacem diligenti sollicitudine a nobis inter eos ordinatam ab ipsis equanimiter concessam, ne vel imposterum oblivione deperiret vel ab ipsis aut ipsorum successoribus aliqua sinistra mutatione turbaretur, et sub cyrographo describendam et sigillo nostro decrevimus roborandam cum testibus subnotatis. Signum Johannis archidiaconi Atrebatensis. Signum Radulfi archidiaconi Ostrevandensis. Signum Johannis prepositi. Signum Johannis decani. Signum Balduini cantoris. Signum magistri Sigeri. Signum Eremberti. Signum Gerardi. Signum Ogeri. Signum Phylippi canonicorum presbiterorum. Signum Nicholai. Signum Guidonis. Signum Hugonis Vituli. Signum Martini. Signum Henrici. Signum Walteri Maraduc. Signum Willelmi de Pas canonicorum diaconorum. Signum Johannis Gamelonis. Signum Symonis. Signum Walteri. Signum Johannis Crispini. Signum Petri. Signum Eustachii. Signum Gileberti. Signum Radulfi. Signum Petri de Watua. Signum Everardi canonicorum subdiaconorum ecclesie nostre. Actum anno Verbi Incarnati Mº Cº LXXXXº IIIº, kalendas aprilis, Feliciter, amen.
TOCK (Benoît-Michel), Les chartes promulguées par le chapitre cathédral d'Arras au XIIe siècle dans Revue Mabillon, n. s. t. 2 (1991), p. 49-97, au n° 27, p. 77-78