Baudouin, comte de Flandre et de Hainaut, notifie que Jean, prévôt de Chimay, a donné à l’abbaye de Foigny la dîme de « Mascons » qu’il tenait en fief d’Alard, seigneur de Chimay
Ego Bald[uinus], Flandrie et Hainonie comes, omnibus notum fieri volo presentibus pariter et futuris quod Johannes prepositus de Cymaco decimam quam tenebat in feodum de Alardo, domino de Cymaco, scilicet decimam de Mascons, assensu nepotum suorum Walteri et Nicholai et neptis sue Milessendis et mariti sui Symonis de Longo Prato, dedit in elemosinam Fusniacensi ecclesie perpetuo possidendam. Unde ad majorem hujus donationis firmitatem predictam decimam in manus dicti Alardi domini sui resignavit et ab hominibus ipsius Alardi qui ibi interfuerunt sibi abjudicari fecit. Postea sepedictus Alardus ipsam decimam in manus meas resignavit et similiter ab hominibus meis sibi abjudicari fecit, quorum nomina sunt hec: Willelmus patruus meus, Gerardus de Gaucia, Nicholaus de Barbenchon et Gillenus, castellanus de Bellomonte. Ego autem ipsam decimam per manum Gilleberti abbatis eidem Fusniacensi ecclesie in elemosinam contradidi, et presentem paginam sigilli mei munimine roborari precepi. Actum anno Domini millesimo ducentesimo.
PREVENIER (Walter), De oorkonden der graven van Vlaanderen (1191 – aanvang 1206), t. 2, Bruxelles, 1964, n° 149, p. 321-322