Arnaud Guilem de Bonas, damoiseau, donne à l’abbaye la terre de Seranied ou, au cas de nullité de cette donation, 300 sous morlas, à prendre sur cette terre ; il reconnaît avoir engagé la terre de Petramolli pour 150 sous morlas.
Notum sit omnibus presentibus pariter et futuris, quod Arnaldus Gillelmi de Bonas, domicellus compos mentis, voluntate spontanea, nullo cogente, sed propria liberalitate sua, pro salute anime sue et parentum suorum, dedit Deo et beate Marie et monasterio de Berdonis ordinis cisterciensis quidquid juris habebat vel habere debebat in tota terra de Seranied ; quod si forte donationem istam contingeret irritari ratione nimie vel inofficiose donationis vel consuetudinis terre donationem hujusmodi fieri non patientis, dedit eidem monasterio super eadem terra CCC sol. morl., quam terram voluit quod predictum monasterium quiete et pacifice possideret donec predicta pecunia a vindicante jus in illa terra, nulla facta retentione ratione fructuum perceptorum vel alicujus emolumenti ex predicta terra provenientis integre dicto monasterio persolvatur ; quare quidquid illud sit, dat in helemosinam monasterio supradicto. Preterea idem Arnaldus Gillelmi recognoscit predictum monasterium terram de Petramolli titulo pignoris pro CL sol. morl. possidere. Et si forte aliquis super premissis dictum monasterium molestaret, debet ei dictus Arnaldus Gillelmi inde portare contra omnes homines bonam garentiam et firmam auctoritatem. Et ut ista firma et stabilia permaneant in futurum, facta sunt in presentia domini Garsie, tunc officialis auxiensis, qui presentem cartam sigillavit in majoris testimonium firmitatis. Testes sunt : magister Sancius, capellanus Sancti Martini Auxiensis, Vitulis, canonicus auxiensis, filius magistri Rainaldi, Arnaldus de Fernaz, W. Daux, Duran Joglar, Vitalis de Benac, frater Deusadjuva, monachus, frater Bernardus Espareg, fr. Arnaldus de Besues, conversi Berdonarum. Supradictus vero Arnaldus Gillelmi de Bonas receptus est in fratrem domus Berdonarum in vita et in morte. Factum est hoc anno Domini MCCXLVI, regnante Lodovico rege Francorum, Centullo comite Astaraci, Ispano auxitano archiepiscopo, mense augusti, luna III.
CAZAURAN (Jean-Marie), Cartulaire de Berdoues, La Haye, 1905, n°453, p.319-320