Honorius episcopus servus servorum Dei dilectis in Christo filiabus abbatisse ac conventui Beate Marie Trecensis salutem et Apostolicam benedictionem.
Justis petentium desideriis dignum est nos facilem prebere consensum et vota que a rationis tramite non discordant, effectu prosequente, complere. Eapropter, dilecte in Christo filie, vestris justis postulationibus grato concurrentes assensu, redditum LXX librarum quem a septuaginta annis retro, in ecclesia Sancti Johannis de Foro Trecensis, cujus jus patronatus ad vestrum monasterium pertinet, proponitis vos habere, sicut illum juste, canonice ac pacifice obtinetis, vobis et monasterio ipsi per vos, auctoritate Apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre confirmationis infringere vel ausu temerario contraire. Si quis autem hoc attemptare presumpserit indignationem Omnipotentis Dei et Beatorum Petri et Pauli Apostolorum ejus se noverit incursurum. Datum Laterani XIII kalendis aprilis, pontificatus nostri anno nono.
LALORE, Documents sur l'abbaye de Notre-Dame-aux-Nonnains de Troyes, 1147-1590, dans Mémoires de la société académique de l'Aube, 3e ser., 11 (1874), n° 143, p. 95.