Rüdiger d' Obernai représentant de Saint-Thomas et Saint-Pierre de Strasbourg
Eichstätt (évêque)
Strasbourg (chapitre Saint-Thomas)
Strasbourg (chapitre Saint-Pierre)
1288/05/28
Strasbourg, Eichstätt
charte
non suspecté
Coram vobis venerabili patre domino episcopo Eistedensi, conservatore privilegiorum fratrum predicatorum per Theutoniam, ut dicitur, a sede apostolica constituto, ego magister Rudigerus de Ehenheim, procurator reverendorum dominorum decanorum sancti Thome et sancti Petri ecclesiarum Argentinensium, conservatorum privilegiorum civitatis Argentinensis a sede apostolica delegatorum, cum dominos meos decanos predictos pro eo, quod viros religiosos fratres predicatores committendo vices suas reverendo domino Mathie canonico ecclesie sancti Stephani in Argentina contra indulta privilegiorum suorum excommunicari, ut dicitis, indebite procurarunt, auctoritate vestra monitos intellexerim, ut infra decendium a recepcione literarum vestrarum monitoriarum dictis fratribus de illatis injuriis, ut dicitur, satisfaciant conpetenter, alioquin eosdem dominos meos decanos predictos citari mandaveritis, ut tricesima die a tempore publicacionis litterarum vestrarum earundem conparere debeant coram vobis in Eysteten audituri et recepturi, quod dicta-verit ordo juris, et suam innocenciam ostensuri, excipiendo propono et dico dictorum dominorum meorum decanorum nomine et pro ipsis, quod dicta vestra monicio et citacio calumpniosa est frivola et iniqua, et quod predicti domini decani coram vobis venire non debent vel vobis parere, quodque vos in eosdem dominos decanos animadvertere non potestis ex eo, quod predicti domini decani conservatores dati a sede apostolica privilegiorum civitati Argentinensi ejusque civibus et incolis indultorum conmittendo vices suas domino Mathie canonico ecclesie sancti Stephani predicti hoc jure fecerunt, cum cuilibet delegato a principe jurisdictio dandi judicem concedatur a jure, ut probatur extra de of. deleg. c. pastoralis et c. quoniam apostolica sedes. igitur conmissio predicta juris permissione facta injuriosa dici non potest notorie neque vere, nec vos auctoritate conservatoria cognoscere vel vos intromittere potestis, utrum domini decani predicti hoc de jure vel injuria fecerint. probatur hoc et notatur expresse per dominum Innocencium super constitucione nova extra de of. deleg. statuimus. notatur etiam hoc idem per dominum Hostiensem in summa sua de off. deleg. § quibus modis ejus jurisdictio prorogetur versu. item fit prorogacio ex vi clausule generalis et cetera. auctoritate enim conservatoria, si quam habetis, a manifestis injuriis et violenciis tantum potestis defendere eos, quos sedes apostolica vobis defendendos conmisit, servata forma mandati apostolici, nec ad alia, que judicialem indaginem exigunt, vestram potestis extendere potestatem, ut probatur in preallegata constitucione nova statuimus. sed et vestra monicio et citacio nullam facit mencionem de injuria aliqua notoria vel excessu manifesto vel notorio mencionem. item si predictus dominus Mathias fratribus predicatoribus aliquam injuriam irrogasset, hoc dominis decanis predictis suo jure functis reputari non posset, sed pocius inputandum foret predicatoribus, qui coram eodem domino Mathia suum privilegium, si quod habent, nec aliquid aliud allegarunt nec etiam appellarunt. propter quod sentencia excommunicacionis majoris per eundem dominum Mathiam prolata contra ipsos ligati sunt fratres predicti maxime ex contemptu. sicque audiendi non sunt coram vobis nec est eis aliquatenus respondendum. item conservacionis littere, si que sunt, quarum auctoritate procedere intenditis, vel privilegia fratrum predicatorum de conservacione decanis predictis conmissa vel privilegia civibus et incolis civitatis Argentinensis concessa nullam faciunt mencionem nec ea revocant quoquo modo. unde vos de ipsis vel processibus ex eis vel ab eis secutis judicare vel cognoscere non habetis, sed minorem potestatem vel ad majus equalem. propter quod iterum in decanis predictis animadvertere non potestis, cum non habeatis imperium par in parem, item quia locus Eistetensis predictus ultra terciam vel quartam dietam a finibus Argentinensis dyocesis distat, item quia mortuo domino papa mandatore littere conservatorie, si que sunt, quarum auctoritate procedere intenditis, exspirarunt, re integra existente, item quia iidem domini mei decani coram vobis apud Eysteten venire vel conparere non possunt nec audent propter
viarum discrimina et propter metum, qui potest cadere in constantem. peto igitur a vobis, quatenus in dicto negocio supersedere velitis et quod dominos meos decanos predictos ab inquietacione hujusmodi absolvere velitis et ulterius non vexare. et ne, excepcionibus et defensionibus hujusmodi non admissis, contra dominos meos decanos predictos per vos vel alium quempiam auctoritate vestra, si quam habetis, excommunicationis suspensionis vel interdicti aut alia quevis sentencia proferatur et ammonicione et citacione vestra et gravamine predicto dictis decanis indebite per eas illato, sedem apostolicam in hiis scriptis appello et apostolos instanter peto, me et dominos meos decanos predictos et res ipsorum protectioni sedis apostolice supponendo. testimonium quoque super hiis invoco presencium dominorum.
WIEGAND (Wilhelm), Urkundenbuch der Stadt Strassburg, 2 ; Politische Urkunden von 1266 bis 1332, Strasbourg, 1886, n° 147, p. 102-104.