Nicolaus episcopus servus servorum dei dilecto filio.. preposito ecclesie sancti Germani extra muros Spirenses salutem et apostolicam benedictionem. querelam dilectarum in Christo filiarum.. priorisse et conventus monasterii sancti Marchi extra muros Argentinenses ordinis sancti Augustini secundum instituta et sub cura fratrum predicatorum viventium recepimus continentem, quod nonnulli clerici et ecclesiastice persone tam religiosi quam seculares etiam in dignitatibus et personatibus constitute ac barones, milites et laici Basiliensis Argentinensis et Spirensis civitatum et diocesum, qui terras domos possessiones et alia bona immobilia sub annuo censu vel redditu a monasterio ipso tenent, hujusmodi censum seu redditum eis contra justitiam exhibere non curant, quamquam terrarum domorum possessionum et aliorum bonorum premissorum possessionem pacificam habeant et fructus integre percipiant eorundem, propter quod prefatis priorisse et conventui grave imminet prejudicium et eidem monasterio non modicum detrimentum. cum autem pro parte ipsarum priorisse et conventus ad nostram providenciam super hoc habitus sit recursus, discretioni tue per apostolica scripta mandamus, quatinus, si est ita, dictos clericos, personas ecclesiasticas, barones milites et laicos ad exhibendum prefatum censum et redditum priorisse et conventui memoratis integre, ut tenentur, monitione premissa, per censuram ecclesiasticam, appellatione remota, previa ratione conpellas proviso, ne in terras dictorum baronum excommunicationis vel interdicti sententiam proferas, nisi super hoc a nobis mandatum receperis speciale. testes autem, qui fuerint nominati, si se gratia odio vel timore subtraxerint, censura simili appellatione cessante conpellas veritati testimonium perhibere. datum Rome apud sanctum Petrum 10 kalendas maji pontificatus nostri anno primo.
WIEGAND (Wilhelm), Urkundenbuch der Stadt Strassburg, 2 ; Politische Urkunden von 1266 bis 1332, Strasbourg, 1886, n° 143, p. 99-100.
original
Strasbourg, AM, archives des hospices, lad. 89, fasc. 14