Super hoc quod Guillermus Grognez ascensivit a fratribus milicie Templi de Pruvino domum eorumdem fratrum sitam in Valle Sancti Aygulphi, in Cursu Equorum.
Universis presentes litteras inspecturis, H[emericus], christianitatis Pruvinensis decanus, salutem. Noverit universitas vestra quod Guillermus Grognez de Pruvino, in nostra presentia constitutus, recognovit se ascensivisse in perpetuum pro se et heredibus suis a fratribus milicie Templi de Pruvino domum eorumdem fratrum sitam in valle Sancti Aygulphi, in Cursu Equorum, pro quindecim solidis pruvinensium et duobus denariis censualibus reddendis annuatim dictis fratribus in festo sancti Johannis Baptiste. Ascensivit etiam coram nobis ab eisdem fratribus in perpetuum vineam eorumdem de Stannis pro decem solidis et quatuor denariis et obolo censualibus reddendis annuatim dictis fratribus in crastino natalis Domini. Concesserunt etiam dicti fratres quod dictus Guillermus vel heredes sui po[s]sint dictas domum vel vineam vendere, invadiare vel permutare quocienscumque voluerint, salvis semper eisdem fratribus quindecim solidis et duobus denariis super domum predictam constitutis, et decem solidis et quatuor denariis et obolo de vinea, et laudibus et venditionibus ad usum castri Pruvini constitutis. In cujus rei testimonium et confirmationem, presentes litteras sigilli nostri munimine roboravimus. Actum anno gratie Mº CCº vicesimo octavo, mense junio.
CARRIERE (Victor), Histoire et cartulaire des templiers de Provins, Paris, 1919, n°LX