Abbé et prieur de sainte-Geneviève et prieur de Sainte-Eloi de Paris
Provins (commanderie du Temple)
1232/01
Sens
charte
non suspecté
Super hoc quod Hugo Monetarius et Elysabeth, uxor ejus, petebant a fratribus milicie Templi decem [et octo] arpenta terre, sita apud Savigniacum, et unam granchiam et medietatem cujusdam domus.
Omnibus presentes litteras inspecturis, abbas et prior Sancte Genovefe et prior Sancti Eligii Parisiensis, a domino papa delegati, salutem in Domino. Noverit universitas quod cum Hugo Monetarius et Elysabeth, ejus uxor, peterent a fratribus milicie Templi decem et octo arpenta terre sita apud Savigniacum, ut predicti H[ugo] et E[lisabeth] asserebant, et unam granchiam et medietatem cujusdam domus, et de predictis ab utraque parte fuisset in fratrem Haymardum compromissum, alte et basse fide data, retenta nobis de consensu partium potestate compellendi partes ad observationem dicti arbitrii si forte aliqua partium resiliret, dictus frater Haymardus, in nostra presentia constitutus, veritate inquisita, dictum suum partibus presentibus protulit in hunc modum, dicens: Quod terram petitam, que revera non continet nisi quatuordecim arpenta, emerunt dicti fratres pro sexaginta et octo libris pruvinensium et uno dolio vini valentis quadraginta solidos pruvinensium, et licet dominus H[ugo] et E[lisabeth], ejus uxor, n[u]llum jus in predicta terra de cetero reclamare possi[n]t, nec in fructibus inde perceptis, nec in granchia nec in medietate domus petitis, immo de jure, quita fratribus milicie Templi remanere debeant secundum consuetudinem terre, tamen dictus frater Haymardus posuit in optione ipsius Hugonis et E[lisabeth], uxoris ejus, ut si velint habere dictam terram et plateas, in quibus fuerant granchia et medietas domus supradicte, solvent fratribus milicie Templi quinquaginta sex libras pruvinensium [infra] instantem Purificationem beate Marie, vel laudent et quitent ad cautelam eisdem fratribus terram et plateas predictas, et laudari et quitari faciant ab heredibus suis in perpetuum possidendas, et de garantia portenda contra omnes dent sufficientes fidejussores eisdem fratribus, infra terminum supradictum, coram decano christianitatis Pruvinensis, cujus litteras testimoniales utraque pars petere tenebitur super premissis; quibus omnibus completis, dicti fratres dabunt decem libras pruvinensium Hugoni et E[lisabeth], ejus uxori, predictis. Sic ab omnibus querelis, quas partes ad invicem contra se habebant vel habere poterant usque ad diem compromissionis in dictum fratrem Haymardum facte, videlicet usque ad diem martis post Inventionem beati Stephani anno Domini Mº CCº XXXº, partem utramque duximus absolvendam. In cujus rei testimonium, presentes litteras fecimus sigillorum nostrorum munimine roborari. Actum anno Domini Mº CCº XXXº Iº, mense januario.
CARRIERE (Victor), Histoire et cartulaire des templiers de Provins, Paris, 1919, n°LIV