Le même prélat notifie que Béatrix, comtesse de Guînes et châtelaine de Bourbourg, a reconnu devant lui qu’elle avait extorqué injustement à l’abbé de Saint-Bertin la promesse du paiement d’une somme de quatre-vingts livres de Flandre. Elle regrette son péché et renonce au bénéfice de cette obligation.
Adam etc. Noverit universitas vestra quod Beatrix, comitissa Gisnensis et castellana de Broburg, coram nobis est confessa quod ante aliquot annos, minis et injustis vexationibus, Johannem abbatem Sancti Bertini coegerit octoginta libras flandrenses sibi promittere et etiam litteras et sigillum ecclesie sue de hoc dare. Quod quia, ad monitionem nostram, peccatum fuisse cognovit, veniam humiliter petens, abbatem predictum et ecclesiam suam de eisdem octoginta libris quitos clamavit; et promisit bona fide quod litteras predictas, quas asserebat se amisisse, si aliquo modo inveniri possent, redderet, ita quod nullum inde ecclesie Sancti Bertini dampnum proveniret. Fide itaque data juravit quod nec per se, nec per alium aliquem, prefatam ecclesiam super premissis molestaret, nec artem vel ingenium ad eam molestandam quereret; ac pro hoc, ad petitionem ipsius, has litteras abbati Sancti Bertini dedimus, promittentes ipsi et ecclesie sue quod, si dicta comitissa eos super predictis in aliquo gravaret, eam excommunicaremus, quia hoc ipsa a nobis requisivit et nos hoc juri consonum esse credimus, cum ea que vi vel metu fiunt, auctoritate canonica et legum non sint observanda sed potius irritanda. Actum est hoc apud Broburgum, anno Domini M.CC sexto decimo.
HAIGNERE (Daniel), Les chartes de Saint-Bertin, t. 1, Saint-Omer, 1886, n° 543.