Notum sit omnibus tam futuris, quam presentibus, quod querela, quam magister A., clericus, habebat contra ecclesiam Bassi Fontis super quadam domo, que querela ex parte domini Pape coram domino W. et domino B. Sancti Machuti et de Barro decanis tractabatur, modo isto pacificata est: Predictus A., clericus, bonorum ac discretorum virorum usus consilio, coram multis in domo, pro qua querelam moverat, se nichil habere recognovit, et ut fratres Bassi Fontis a modo pacifice et quiete eam possiderent concessit. Dominus vero B., decanus Barri, in cujus presentia concordia ista facta fuit, presentem paginam sigillo suo in testimonium sempiternum confirmavit. - Actum est hoc anno Incarnati Verbi millesimo ducentesimo quinto.
LALORE, Cartulaire de l'abbaye de Basse-Fontaine. Chartes de Beauvoir, Paris-Troyes, 1878 (Collection de principaux cartulaires du diocèse de Troyes), 3), n° 83, p. 110