Roger, châtelain de Lille, notifie que Baudouin de Hantay a vendu à l'abbaye d'Hénin-Liétard une part de dîme à Acheville, qu'il tenait en fief de lui
Ego Rogerus Insulensis Castellanus notum fieri uolo omnibus tam futuris quam presentibus quod pro anima patris mei Iohannis Castellani concessi ecclesie de Hennin quandam decimam apud Asseluile, quod de feodo meo descendebat, liberam [et] absque omni seruitio et exactione in perpetuum tenendam. Quam decimam cum Balduinus de Hanstais de Hugone de Belmont homine meo in feodum teneret et eam predicte ecclesie absque omni iure et seruitio alicuius domini uendidisset, et predictus Hugo hanc uenditionem coram hominibus suis, paribus Balduini, et eorum iudicio bene et legitime factam concessisset, et Balduino abbati et fratribus ecclesie qui aderant, cum ramo et cespite, liberam, ut dictum est, reddidisset, ego quoque ad petitionem ipsius Hugonis hominis mei, interuentu bonorum uirorum mediante, quidquid iuris et dominii in predicta decima habebam, sepedicte ecclesie, ut dixi, sub testimonio hominum meorum qui subscripti sunt, in eelemosinam concessi. Et si quis de cetero contra hoc aliquid attentaret, adjutorem et defensorem me opponere ad tuendum ius Ecclesie promisi. Vt igitur certum hoc omnibus habeatur et ratum, cum sigillum adhuc proprium non haberem, sigillo domini Iohannis abbatis de Phalempin, patrini, presentem paginam confirmare et munire uolui. Actum anno Domini Mº CCº VIIIº, mense aprili, Vº Idus eiusdem mensis, coram hiis testibus : Hellino de Gondecort, tunc bailliuo terre mee. Hellino del Bruile. Petro de Wanebrechies. Roberto de Templomartis. Letardo de Ploicio et multis aliis.
BECQUET (Jean), L'abbaye d'Hénin-Liétard. Introduction historique, chartes et documents (XIIe-XVIe s.), Paris, 1955, n° 30, p. 71-72