Le prévôt Roger, le doyen Pierre et le chapitre d'Arras concèdent au prêtre Gilbert, sa vie durant, une partie des revenus de la paroisse de Saint-Sauveur ainsi que le sixième de la dîme de Saulty. Après la mort de celui-ci et celle de Denis, la dîme fera retour au Chapitre.
R. prepositus, P. decanus, cum universo Atrebatensis ecclesie capitulo etc. Notum facimus universis quod, communi consensu et approbatione fratrum nostrorum, Gilleberto presbitero, tota vita sua tenendum et percipiendum, concessimus quicquid de parrochia Sancti Salvatoris, preter l. libras nostre monete et unam libram cere in communes usus nostros provenire debebit, ut ita, nostra liberalitate ab omni parrochiali onere liber, cum emolumento eciam temporali ecclesie nostre familiarius teneatur servire, et si sacerdos institutus, vivente Gilleberto, decesserit, alium consilio ipsius substituemus. Preterea eadem decernimus incolumitate durare quod predicto G., super sexta parte decime de Sauti, quam nobis et ecclesie propriis sumptibus comparavit, non sine communi deliberatione nostra concessimus, videlicet quod predicte decime fructus, tam ipse quam alumpnus ejus Dionisius, debeant, cum omni libertate et integritate, tota vita sua tenere, et prout ipse vivens ordinaverit, post decessum utriusque in usus nostros devenire.…
Factum in capitulo nostro et sigillo nostro corroboratum, anno Domini millesimo centesimo LXXXº. Datum per manum Sigeri magistri scolarum, subscriptis nominibus qui interfuerunt et assensum prebuerunt. Signum Rogeri prepositi. Signum decani. Signum Anselmi cantoris. Signum Galteri de Bapalmes. Signum Anastasii. Signum Baldevini. Signum Mathei, canonicorum presbiterorum. Signum Elemberti. Signum Petri. Signum Guidonis. Signum Nicholai. Signum Henrici, canonicorum diaconorum. Signum Herberti. Signum Hugonis. Signum Martini. Signum Galteri. Signum Everardi. Signum Johannis. Signum Petri. Signum Roberti. Signum Johannis. Signum Nicholai, canonicorum subdiaconorum.
LOISNE (Auguste de), Le cartulaire du chapitre d'Arras, Paris, 1896, n° 48, p. 39-40