Mathieu, comte de Beaumont, accorde à l’abbaye de Lannoy une charte d’exemption de tout droit de travers dans le comté de Beaumont
In nomine sancte et individue Trinitatis. Ego Matheus comes Bellimontis notum facio omnibus tam presentibus quam futuris quod pro salute mea patris quoque mei et matris et liberorum meorum, ecclesiam Sancte Marie de Briostel, de transverso omnium rerum suarum per totam ditionem meam transeuntium, earum videlicet que ad usum universorum prefate ecclesie fratrum vel eorumdem omnium mansionum pertinent, omni consuetudine liberam et absolutam in perpetuum facio. Quod si ministri mei utrum res, que ducentur, ad predicte usus ecclesie pertineant dubitaverint, aliquis ductorum, cui licebit, fidem dabit quod res ducte ad prenominatos ecclesie usus addicte sint et devote, et sic libere poterunt transire. Si autem fidem dare noluerit, consuetudinem reddat. Si vero fide data mendacii comprobatus fuerit, consuetudinem cum forefacto reddere cogatur. Actum est hoc Lusarchiis ante portam munitionis mee, concedente Aelidi comitissa uxore mea, filiis quoque meis Matheo et Philipo, astantibus et testificantibus Renoldo de Bellomonte, Petro de Runqueroles et Petro de Bosrenc et Petro Hildus, anno ab incarnatione Domini millesimo centesimo sexagesimo sexto, die dominica septima kalendas octobris.
DELADREUE (L.-E), Histoire de l’abbaye de Lannoy (ordre de Cîteaux), dans Mémoires de la Société Académique d’Archéologie, Sciences et Arts du département de l’Oise, 10 (1877-1879), p. 405-484 et 569-696 ; 11 (1880-1882), p. 156-236, 289-448 ; n° 30, p. 659