Donation d’un mas et de droits de pacage par Raymond Cédal, sa femme et ses enfants.
DE DONO RAIMUNDI CEDALII DE MANSO DE CAUSEIRAS
Anno ab incarnatione Domini M°C°LX°VIII°, ego Ema et ego Raimundus Cedalii, maritus ejus, et infantes nostri, Companz et Raimundus et Bernardus, nos omnes insimul, bona fide et sine inganno et absque omni retentu, pro amore Dei et remissione peccatorum nostrorum, donamus et laudamus et titulo donationis cum hac carta tradimus Deo et monasterio Beate Marie de Salvanesc et tibi Pontio, abbati, omnique ejusdem loci conventui presenti et futuro, totum mansum qui vocatur Causerias, qui est juxta territorium de Molleiras, videlicet alodium, fevum, beneficium et vicairiam et decimam, terras cultas et incultas, prata, nemora, pascuas, cursus aquarum et recursus et quicquid in ipso manso est et ad ipsum pertinet. Et si aliqua persona amparaverit vel abstulerit vobis aliquid in predicto manso, erimus vobis testes fideles semper et prompti adjutores ; et similiter damus et concedimus vobis ut omnia animalia vestra cujuscumque maneriei sint libere semper pascatis in omnibus pascuis nostris ubicumque sint ; et vos pro his omnibus predictis dedistis nobis de caritate II boves. Et sciendum est quod nos predicti, ego videlicet Ema et ego Raimundus, maritus ejus, et ego Companz, amborum filius, nos omnes juravimus super sancta evangelia omnia predicta ut firma et illibata vobis et posteris vestris semper permaneant ; et vos pro amore Dei debetis recipere predictum filium nostrum Raimundum per monachum cum fuerit etatis XV annorum, quem nos interim debemus nutrire et facere docere, et vos in unoquoque anno ad instructionem ejus debetis V solidos dare et semel in anno de pannis vestris vestire ; quod si predictus infans interim, quod absit, mortuus fuerit vel ad vos venire noluerit vel si venerit et postea discesserit, nichilominus omnia predicta habeatis et possideatis et vos et successores vestri in perpetuum. Testes hujus rei sunt : Guillelmus de Lauro, Petrus de Monteacuto, Ugo Cedalii, Berengerius de Ripaalta, Raimundus de Murantione, Jordanis de Ponte, Bernardus de Vitte, Raimundus Jori et Guillelmus Fornerii.
VERLAGUET (Pierre-Aloïs), Cartulaire de l’abbaye de Sylvanès, Rodez, 1910, n°292, p.233-234
cartulaire
Rodez, AD Aveyron, H(006) 001, cartulaire de l’abbaye de Sylvanès