Donation de la moitié du mas de l’Albarède par le même et ses sœurs.
ITEM DE DONO STEPHANI DE ALBAREDA EJUSQUE SORORUM
Anno ab incarnatione Domini M°C°LX°VI°, ego Stephanus de l’Albareda et ego Vivas et ego Beliardis, sorores ejus, nos omnes insimul, bona fide et sine inganno, pro amore Dei et remissione peccatorum nostrorum et pro animabus parentum nostrorum et absque omni retentione, donamus et laudamus et titulo perfecte donationis cum hac carta tradimus Deo et monasterio Beatę Marię de Salvanesc et tibi Pontio, abbati, omnique ejusdem loci conventui presenti et futuro, medietatem mansi de l’Albareda, videlicet alodium, fevum, beneficium et cum omnibus pertinentiis suis et quicquid ibi habemus et habere debemus. Pro hac donatione et laudatione dedistis nobis de caritate C solidos Melgorienses. Et sciendum est quod nos supradicti, videlicet ego Stephanus et ego Vivas et ego Beliardis, nos omnes juravimus super sancta evangelia predictam donationem, ut firma et stabilis vobis omni tempore permaneat, et ut reddamus vobis predictam peccuniam si aliqua persona ante vos per rectum juditium portare potuerit predictum honorem. Testes laudationis ac juramenti Stephani de Albareda et sororis ejus Beliardis sunt : Ademarus de Montealegre et Guillermus, frater ejus, Geraldus de Monteacuto, Stephanus Johannis de Montepavone, Guillermus Adam de Rocosello, Arnaldus de Roca. Testes vero laudationis et juramenti Vivę, sororis eorum, sunt : Bernardus Gauterii de Montepavone, Stephanus Johannis, Petrus Niger de Ripa, Petrus Bovet, Petrus Guiringerius, et Guitbertus Bouet de Montepavone.
VERLAGUET (Pierre-Aloïs), Cartulaire de l’abbaye de Sylvanès, Rodez, 1910, n°286, p.229
cartulaire
Rodez, AD Aveyron, H(006) 001, cartulaire de l’abbaye de Sylvanès