Donation faite pour cause d’entrée en religion par Alamande, veuve de Raymond Cabanel.
DE DONO ALAMANDE SCILICET AVA
Anno Dominicę incarnationis M°C°LVI°, ego Alamanda, vocata Ava, que fui uxor Raimundi Cabanelli, cum consilio et laudatione infantum meorum, videlicet Ademari, Bernardi, Raimundi, Begonis et Guillelme, et aliorum amicorum meorum, scilicet Raimundi Rotbaldi, Guillelmi Froterii et Bernardi Cairelli, fratris ejus, Petri Nigri, Pontii Pagani, Guillelmi de Massili et Martini Fabri, offero et dono Ugonem, filium meum, Deo et monasterio Beatę Marię de Salvanesc per servum et per monachum. Et notum sit omnibus quod ego Alamanda et infantes mei, videlicet Ademarus, Raimundus, Bernardus, Bego et Guillelma, et ego Ugo, qui fui filius Raimundi Cabanelli, nos omnes insimul, bona fide et sine inganno et absque omni retentu, donamus et laudamus hereditario jure cum predicto Ugone monasterio Salvaniensi prescripto et tibi venerabili Geraldo, abbati, omnique ejusdem loci conventui, mansum qui vocatur Generac et alio nomine vocatur Rofiac, scilicet alodium, fevum, beneficium, vicariam, sirventatgue et terciam partem totius decimę, terras cultas et incultas, nemora, pascuas, aquas et quicquid in manso est et ad mansum pertinet, et terciam partem decime illius mansi quem tenet prior de Petra. Hanc donationem facimus integre et fideliter et absque omni retentione ita quod etiamsi predictus Ugo noluerit esse monachus vel frater ipsius monasterii si mortuus fuerit, nichilominus habeatis et possideatis predictum mansum cum omnibus pertinentiis suis, quoniam dedistis nobis CCCXXX solidos Melgorienses ut firma et stabilis predicta donatio omni tempore et illibata vobis et posteris vestris permaneat. Et sciendum est quod supradictam donationem facimus pro nostra melioratione et pro magna utilitate nostra, quoniam prefatum Ugonem collocavimus in predicto monasterio, et de supradictis solidis liberavimus de pignore et traximus nostrum honorem de Brocia et honorem quem habemus apud Faetum et civatam censualem de Montelauro et predictum mansum similiter traxistis de pignore. Et si aliqua persona amparaverit vel abstulerit vobis aliquid in predicto honore, nos erimus vobis testes et defensores semper secundum rationem justicię. Testes hujus rei sunt : Raimundus Rotbaldi, Guillermus Froterii et Bernardus Cairelli, frater ejus, Pontius Pagani, Guillelmus de Massili, Martinus Faber, Bernardus Faber, Ugo Senglar et Ugo de Viridisilva, monachus de Salvanesc.
VERLAGUET (Pierre-Aloïs), Cartulaire de l’abbaye de Sylvanès, Rodez, 1910, n°277, p.222-223
cartulaire
Rodez, AD Aveyron, H(006) 001, cartulaire de l’abbaye de Sylvanès