Transaction et sentence arbitrale, entre l’abbaye et le monastère de Pessan, au sujet d’une redevance de 13 conques de blé. – Le 6 des nones de juillet 1256.
In Xristi Domine. Notum sit cunctis presentibus et futuris quod cum inter abbatem et conventum monasterii de Pesano, ordinis Sancti Benedicti auxitane diocesis ex una parte, et abbatem et conventum Berdonarum ordinis Cisterciensis ejusdem diocesis ex altera, super diversis et variis questionibus, querelis et injuriis infra in libello conscriptis et declaratis causa verteretur, dompnus Artamandus, abbas de Pessano, pro se et conventu suo et dompnus R., abbas Berdonarum, pro se et conventu suo, unanimiter et concorditer fecerunt, elegerunt sibi et constituerunt amicabilem compositorem arbitrum sive arbitratorem dominum B., abbatem Cimorre, consentientes in eum, dantes eidem licentiam et liberam potestatem et auctoritatem arbitrandi, non solum de questionibus motis vero etiam de omnibus hiis que moveri possent usque in hodiernum diem inter partes quoquo modo, promittentes bona fide per stipulationum validam et firmam pro se et suis in perpetuum tenere et firmiter servare quidquid dictus arbiter terminaret, diffiniret arbitrio dicto, voluntate, judicio vel amicabili compositione, et hoc promiserunt sub pena centum marcarum argenti, que pena detur a parte inobediente parti obedienti arbitrio sive judicio dicti arbitri in suo robore nichilominus duraturo. Voluerunt etiam partes quod dictus arbiter vel successor ipsius qui pro tempore fuerit abbas Cimorre, possit cognoscere, judicare de pena supradicta et compellere ad eam solvendam partem inobedientem parti obedienti. Et pro omnibus supradictis tenendis et complendis partes obligaverunt omnia mobilia et immobilia presentia et futura et corporali juramento ad majorem rei firmitatem presens compromissum adfirmarunt, renuntiantes scienter et consulte omni juri canonico et civili et speciali et generali et terre consuetudini et omnibus aliis sibi auxiliis competentibus vel competituris contra arbitrium, mandatum dictum seu compositionem amicabilem inferius annotatam. Actum est hoc in octava Sancti Joannis Baptiste anno Domini MCCLVI. Hujus rei sunt testes : B de Arrapasac, abbas Fageti et R. W. Darrapasac, archidiaconus helsensis, B. de Sales, prior Peciani et B. de Saviaco. cellerarius ejusdem loci et A. de Avezano et W. B. de Barbarencs, monachi dicti loci et P. de Montesquivo et P. de Marcellano, monachi Cimorre et frater P. de Cortade, procurator Berdonarum et frater Johannes de Saviaco, hospitalarius Berdonarum et fr. B. de Labatud. monachi Berdonarum et frater B. de Cimorra et frater B. Espareg, conversi Berdonarum, Philippo[us] de Berduno, diaconus et P. de Pessano, diaconus et Brunus, scriptor publicus, notarius astaracensis.
CAZAURAN (Jean-Marie), Cartulaire de Berdoues, La Haye, 1905, n°452, p.314-315