Herveus Dei gratia Trecensis episcopus, omnibus, ad quos iste littere pervenerint, in Domino salutem. Noverit universitas vestra quod homines de Marciliaco, videlicet Theobaldus de Grinum, Galterus frater ejus, Radulfus cognomento Bodinus, Jacobus, Thomas, Hugo filius defuncti Renerii, Hugo cognomine Veilarz, et Vincentius in nostra presentia constituti quitaverunt pacifice usuarium quod se habere dicebant in boscho monialium de Paraclito, quod dicitur Coldroi, super quo litigaverant coram judicibus a domino Papa delegatis, scilicet.. episcopo,.. abbate de Chagia, et.. cantore Meldensibus; et predicti homines eamdem quittacionem uxores suas et liberos suos laudavisse coram nobis recognoverunt. Nos igitur, ad petitionem utriusque partis, presentes litteras scribi fecimus et sigilli nostri munimine roborari. - Actum anno gratie M° CC° XII°, mense junio.
LALORE, Cartulaire du Paraclet, 1878 (Collection des principaux cartulaires du diocèse de Troyes, 2), n° 139, p. 147-148.