Description
-
Jean (l'Aveugle), roi de Bohême et de Pologne, comte de Luxembourg
-
Simon Philippe de Pistoia
-
-
-
Jean (l'Aveugle), roi de Bohême et Pologne, comte de Luxembourg
-
-
Trèves
-
BELGIQUE, Bruxelles, Archives Générales du Royaume, Fonds Chartes et Cartulaires de Luxembourg, n° 637
-
Original sur parchemin, 305 x 415 mm. Neuf incisions pour sceaux pendants dont huit comportent des queues doubles en parchemin avec des sceaux.
-
français
-
non suspecté
-
Charte
-
Original
-
Jean, roi de Bohême et de Pologne, comte de Luxembourg, donne en fief les [mayeries] et les villages de Wellin, Avenne-lez-Saint-Hubert dans la prévôté de Poilvache, et les [mayeries] de Heyd, Tour, Lorcé, Ayne, dans la prévôté de Durbuy, et les [mayeries] et villages de Longvilly, Amberloup et Rendeur ainsi que dans la prévôté de La Roche à Simon Philippe de Pistoia pour des services perçus aussi bien par son père, l'empereur Henri (7), comme aussi par lui-même. Il se retient un droit de rachat pour la somme de 6.000 livres de petits tournois. Quand il payera cette somme à Simon, ce dernier devra acheter des biens ruraux pour 3.000 livres qu'il récupérera alors comme fiefs. Jean pose des garants à disposition de Simon qui s'engagent contractuellement à Reims.
-
01. Nous Jehans par la grace de Dieu Rois de Boeme et de Poloine, conte de Lucembourc, faisons savoir a touz, que pour plusours services profitables et agreables, que nostre chier et feable chevalier Symon Philippe
02. de Pistoire a la riche memoire de nostre treschier seignour et pere Henri, emperour des Romains, et a nous a fait et fait continuelment, regardant ausi que en porchassant et porsiwir noz besoignes, noz
03. honnours et noz profiz par plusours fois il ait fait grans despens et mis grossement du sien, les queilles choses considerees benignement, voillant a present en aucune maniere recompenseir por ses merites,
04. et que pour exemple de lui les autres enclinent plus volentiers a nous servir, euwe diligente deliberation a nostre consoil et par certaine science donnons et concedons en fief et par raison de fief au dit Symon
05. Philippe, le queil nous avons receu a nostre homme et a ses hoirs perpetueilment sans rappelleir, nostre chastel de Loncpreit avec les maijeries, les villes et les autres choses qui sensiwent, c'est asavoir la ville et la mayerie de
06. Loncpreit, la ville de Welin, la ville et la mayerie d'Anvaine, les queilles sont de la prevosteit de Poilevache. Item la ville et la mayerie de Heiz, la ville de Tour, la ville de Lorci, la ville d'Ayne,
07. le molin d'Ayne desoz Heiz, le molin d'Ayne desoz Fiezine, le molin le Leu et le molin de la Fosse, les queles sont de la prevosteit de Durboy. Item la ville et la mayerie de Lonville, la ville et la mayerie d'Ambrelues et la ville et la mayerie de Randout,
08. les quelles sont de la prevosteit de la Roche. Et les villes apartenans a dittes mayeries et la signourie et la court des dites mayeries, villes et lieus et apartenances et de chascune delles avecques la iustice haute et basse ou soit
09. mer et mixt impere avecques honnours et toutes iuridictions que nous i avons et que nous et nos ancestres avons eu iuques a ci ens dites chastiaus, mayeries, villes, courz, lieus et apartenances et ens touz les habitans
10. des diz lieus, nobles et non nobles, de queil condition quil soient, et aveque toutes les rentes, tailles, chans, dismes, cenz, preiz, boiz, yawes. maisons, jardins, moulins, pastures, touz aisemenz, toutes revenues et
11. generalment toutes les choses que nous i avons ou porriens avoir et que a nostre signorie apartient, donons et concedons au dit Symon Philippe, recevant por lui et por ses hoirs le dit chastel, les mayeries, les villes, les lieus,
12. la signourie, la court et les choses desus dites entierement a avoir, tenir, possideir et useir franchement par lui ou par autre que il vorra et faire des choses desus dites sa volenteit aveques touz acces, issuwes et en-
13. -trees par toutes raisons, actions, usages et requisitions as desus dites choses par queilconques manieres apartenir. Et por ce que le dit Symon Philippe joisse plainement et en bonne pais des maintenant et apres de la possession des
14. dis chastel, villes mayeries, courz, jurisdictions, rentes et biens desus diz, nous por nous et por noz hoirs, le dit Symon por lui et por ses hoirs recevant des desus dites choses et biens, envestons et le mettons en possessi-
15. -on ens es diz biens par la tenour de ces lettres, promettons por nous, noz hoirs et nos successeurs en bonne foy et par nostre sairement fait corporeilment au dit Symon Philippe por lui et por ses hoirs recevant la
16. dite donation, concession et toutes les choses desus dittes et chascune delles tenir fermement sans faire venir al encontre par aucune occoison par nous ou par autre. Et sil avenoit que ja naviegne, que li diz
17. Symon Philippe ou ses hoirs fussent molesteiz ens es choses desus dittes ou en aucune delles, nous leur devons, sommes tenuz et promettons expressement por nous et por noz hoirs de restitueir et de rendre touz les dama-
18. -ges, despenz et interez qu'il aroijent entierement a son simple dit sans autre prueve. Par l'obligation de nous et de noz biens donnons encor au dit Symon por lui et por ses hoirs congie de prendre la possession de
19. touz les biens et choses desus dittes en bonne foy et absolvons encor des maintenant les hommes et les genz des villes et lieus desus diz de toute feautei, hommages et obeissance, et volons qu'il ne soijent tenuz de
20. respondre a nous ne a noz prevoz ne a aucune de noz justices en aucun caz mais que il soijent en lommaige, feauteit et obeissance le dit Symon Philippe et ses hoirs ou de ceaus qui seront establiz de par lui et a lui respon-
21. -dent entierement. Promettons encore por nous et por noz hoirs et successours au dit Symon Philippe por lui et por ses hoirs recevant de defendre et de delivreir le dit chastel, villes et mayeries et toutes les
22. choses desus dittes et chascune par li de touz empeschement, forces, iniures et violences contre chescune personne et de tenir et conserveir les en paisible possession a touziours. Voirement se le dit chastel de Lonc-
23. -prei, mayries, villes, courz, rentes et signories desus dites nous ou noz hoirs vorriemes rachateir por le tens avenir dou dit Symon Philippe ou de ses hoirs, promettons en bonne foy et sairement desus dit
24. et volons estre tenuz que aincois que nous mettons ou souffrons que autre mette auscuns empescemenz a la possession desus dite, nous donrons et paijeront au dit Symon Philippe ou a ses hoirs ou ferons paijer
25. franchement et delivrement a une fois et ensemble en la cyteit de Rains ou en la cyteit de Parijs, en la quelle que le dit Symon Philippe ou si hoir vorront eslire, six mille livres de Tournois petiz forte monoije, cest
26. a savoir un gros tournois vies pour quatorze deniers tournois petiz sans riens rabatre de la dite somme de six mille livres Tournois pour chose que il ou si hoir ou autre de parlui eussent receu des villes,
27. terres, lieus, rentes et choses desus dittes. Mais tout ce que sera escheu ou que il ou si hoir ou autre de par lui aront prijs et levei des choses desus dites, volons et acordons quil soit leur et comme leur le pregnent
28. franchement et delivrement par la raison del hommage des services qu'il nous a fait et fait continueilment, aincois les dittes six mille livres Tournois petiz li ferons paijer et nombreir toutes entierement et
29. plainement es lieus et en la maniere que desus est dit. La quelle somme de six mille livres de Tournois petiz entierement paije en la maniere et lieu que dit est par nous ou par noz hoirs au dit Symon Philippe ou a ses hoirs
30. les diz chastel, villes, mayeries, et toutes les choses dessus dittes revenront a nous et a nos hoirs franchement et entièrement et sera adont tenuz li diz Symon Philippe ou si hoir dachateir terre desouz nostre
31. signorie pour le prijs de trois mille livres Tournois petiz. Laqueile terre il et si hoir tenront de nous et de noz hoirs en fief et hommaige au plus tost que en trouvera terre a achateir en nostre signorie por
32. souffissant marchiet et iuques a tant que on trouvera la terre a achateir, ensi que dit est, li dit Symon Philippe ou si hoir mettront les dites trois mille livres Tornois en garde en la main de la compaignie de la
33. Scale et de la compaignie de Bardes et de la compaignie de Peruces, marchanz de Florence ou daucune delles, et les garderont pour paijer la dite terre qui sera achatee ensi que dit est. Et se le dit Symon
34. ou si hoir achatassent desoz nous terre por la value de trois mille livres Tournois devant que nous leur paijessiens la dite somme, adonc ne seront il tenuz de mettre les dittes trois mille livres en garde ne
35. dacheteir plus de terre outre leur volenteit. Et pour ce que toutes les choses desus dittes et chascune delles soijent confortees et de plus grant aide et favour, mettons nous en ces presentes lettres nostre royal de-
36. -creit. Et volons et agreons que s'il avenoit que li dit Symon Philippe neust hoir legittime de son cors, qu'il puisse faire establir teil hoir comme a lui plaira. Et s'il nen fesist aucun, volons que li plus prochains de
37. son lynage soit entenduz por hoir es choses desus dittes, non contrestant droit, coustume ne usage du paijs ou de nostre terre, se aucunes en i avoit au contraire, mandons et commandons a nostre sénés-
38. -chal qui ores est et qui por le tens sera, a noz prevoz, officianz et a toutes manieres de justices et a touz noz subgiz que contre les choses desus dittes ou aucune delles ne viegnent ne osent en aucune man-
39. -iere venir, aincois le facent a chascun entierement observer et tenir. En tesmoignaige des choses deseur dittes, nous Jehans, roys et cuens devant dit, avons fet pendre nostre seel a ces presentes lettres,
40. et dabondant por plus grant seurteit avons prijet et requiz, prions et requerrons noz chiers feables Gille, signour de Rodemac, Arnold, signour de la Roche, Jehan, signour de Biarewart, seneschal de nostre
41. conteit de Lucembourc a present, Conrad de la Sleyde, Jehan d'Useldenge et Jehan d'Olevelz , chevaliers, Bartholomei, prevost de Thionville et Arnold, prevost d'Erlon, que il et chescun d'eauz soijent por nous
42. et por noz hoirs au dit Symon Philippe et a ses hoirs pleges, garanz et respondanz et promettent et s'obbligent evers lui de tenir et faire tenir entierement touz jours toutes les choses deseur dittes en la maniere que
43. dit est. Et nous Gilles de Rodemac, Arnolz de la Roche, Jehans de Birewart, Conrat de Sleyde, Jehan d'Useldenge, Jehan d'Olevelz, chevaliers, Bartholomei de Thionville et Arnolz d'Erlon, prevoz desus
44. nommeiz, a la prijere et requeste de nostre tres chier et tres amei signour Jehan, par la grace de Dieu, roy et conte deseur dit, nous etablissons nous et chescun de nous por le tout por le dit signour et por ses hoirs
45. au dit monsignour Symon Philippe et a ses hoirs pleges, garanz et principalz respondanz. Et promettons por nous et por noz hoirs de tenir et de faire tenir et d'acomplir toutes les choses deseur dittes en
46. la maniere que dit est souz l'obligation de nous et de noz biens. Et se deffaute i avoit en tout ou en partie que ia naviegne nous et chescun de nous d'abondant avons promiz, promettons et avons encouvent
47. par notre foy et sairement que nous et chescun de nous a la requeste le dit monseigneur Symon Philippe ou de ses hoirs ou de tenant cause deauz d'alleir personalment en la citeit de Rains et la demoreir sans departir
48. jusquatant que des dittes defautes leur sera faite plaine satisfaction, et des damages, despenz et interez aussi a leur plain dit. Et se par aucune raisonnable cause nous ou aucun de nous ne poissiens
49. alleir et tenir le dit estage, nous Gillez de Rodemac et Arnolz de la Roche deseur diz nous poons excuseir pour envoijer et faire demoreir chescun por lui un chevalier. Et nous Jehans de Biarewart,
50. Conrat de Sleyde, Jehan d'Useldenge, Jehan d'Olevelz, Bartholomei de Thionville et Arnolz d'Erlon deseur diz nous poons excuseir por envoijer chescun por lui deus escuiers soffisanz a cheval, les
51. queilz demorront por nous en la ditte cyteit de Rains sans departir et tenront la nostre lieu en la maniere que dit est, soi que ceauz qui i seront pour l'un ne puissent tenir lieu as autres. En tesmoignaige et confirmation
52. des dittes choses, nous Gilles, sires de Rodemac, Arnolz, sires de la Roche, Jehan, sires de Biarewart et seneschauz de la conteit de Lucembourc, Conrat de la Sleyde, Jehan D'useldenges et Jehan sire de Holevelz, chevaliers,
53. Bartholomei, prevost de Thionville et Arnolz, prevost d'Erlon deseur nommeiz avons a ces presentes lettres avec le seel nostre dit signour pendu noz seauz en tesmoignaige de veriteit. Qui furent faites et donnees a
54. Trieves l'an de grace mil trois cens vint et quatre le dizime jour de may. -
« letres de lasenement de la terre de lonpree dardenne et de heiz ke li rois de bome fist a monseigneur Simon Philippe », XVe s.; « lxxiiij », XVIe s.; « XVI. 74. », XVIIe s.
-
ESTGEN, Aloyse; PAULY, Michel; SCHROEDER, Jean; PETTIAU, Hérold (éd.): Urkunden- und Quellenbuch zur Geschichte der altluxemburgischen Territorien. Vol. XI: Die Urkunden Graf Johanns des Blinden (1310-1346). Partie 2: Die Urkunden aus den Archives Générales du Royaume, Brüssel. Publications du CLUDEM, t. 22. Luxembourg 2009; Nr. B.76
-
WÜRTH-PAQUET, François-Xavier: Table chronologique des chartes et diplômes relatifs à l'histoire de l'ancien pays et duché de Luxembourg - Règne de Jean, roi de Bohême et comte de Luxembourg 1310-1346, in: PSH 19 (1864), p. 1-52; Nr. 529
-
VERKOOREN, Alphonse: Inventaire des chartes & cartulaires du Luxembourg (Comté puis Duché), t. II, Bruxelles 1915, Nr. 637
-
David KIRT
Sigillography
-
oui
-
Neuf incisions pour sceaux pendants dont huit comportent des queues doubles en parchemin avec des sceaux en cire brune. A la première incision il manque la queue double en parchemin avec le sceau. La deuxième queue comporte l'inscription "Rodema(ck)"; la troisième queue l'inscription "la roche", la quatrième "biar(wart) et la neuvième "Erlon"
Informations
Document
David
Kirt
(Université de Luxembourg), dans
TRANSSCRIPT
TRANSSCRIPT Project. Writing and Governance. Cultural transfers between France and the Empire (13th-16th centuries), dir. I. Guyot-Bachy (CRULH) et M. Margue (IPSE), éd. électronique TELMA (IRHT), Orléans, 2017 [en ligne], acte n. 14763 (transscript-315), http://telma.irht.cnrs.fr/chartes/en/transscript/notice/14763 (mise à jour : 05/03/2019).