« transscript-153 »

Document | transscript/notice/252
plus d'informations

Description

  •  
    Henri de Ribeaupierre, écuyer, fils de feu Olry de Ribeaupierre, chevalier
  •  
    Conrad, fils de Conrad, dit Gutmann, de Hattstatt
  •  
    Ferry, fils de Jean, dit Olry, de la Maison (von der Husen)
  •  
    Armand de Schwartzau
  •  
    Willaume, dit Coleman de Fribourg, écuyer
  •  
    Thiébaut (2), duc de Lorraine et marquis
  •  
    Willaume, dit Coleman, de Fribourg, écuyer
  •  
    Armand de Schwartzau
  •  
    Ferry, fils de Jean, dit Olry, de la Maison (von der Husen)
  •  
    Conrad, fils de Conrad, dit Gutmann, de Hattstatt
  •  
    Henri de Ribeaupierre, écuyer, fils de feu Olry de Ribeaupierre, chevalier
  •  
    1304/03/16

  •  
    FRANCE, Nancy, Archives départementales de Meurthe-et-Moselle, B 574 n° 40
  •  
    Original sur parchemin (385 x 360 mm), scellé de huit sceaux sur double queue de parchemin
  •  
    français
  •  
    non suspecté
  •  
    Lettre
  •  
    Original
  •  
    Henri de Ribeaupierre, écuyer, fils de feu Olry de Ribeaupierre, chevalier, Conrad, fils de Conrad de Hastatt, Ferry, fils de Jean dit Olry de la maison, Armand de Schwartzau et Willaume dit Coleman de Fribourg, écuyer, s’engagent à ne rien demander au duc de Lorraine pour leur captivité à cause de feu Warnier d’Apei lui mourut à Saint-Dié, sous peine de 400 marcs de fin argent à verser au duc sur le témoignage de Jean, comte de Salm ou Henri, seigneur de Blâmont, ou Burnique de Riste ou deux chevaliers suffisants, desquels 400 marcs ils constituent plèges, Jean, comte de Salm, Henri, seigneur de Blâmont, Ancel de Ribeaupierre, Conrad, fils du comte de Fribourg, Wautier de Géroldzeck, Wuier, dit le Bonhomme, de Hastatt, Eggle de Ratsamhausen, Thierri de Bercheim (?), Simon, écuyer, fils du comte d’Alsace, Huon de Hilsprich, écuyer, et Burnique de Riste, écuyer, qui promettent de se réunir à Saint-Dié quinze jours après que le duc les en aura requis.
  •  
    01. Nous Hanris de Rabaupiere escuiers, fils monsire Olri de Rabaupiere chevalier qui fut, Conraus, fils monsire Conraut con disoit Bonhome de Hazestat, Ferris, fils Jehant dit Orli de
    02. la maison, Harmans de Xowartese et Wyllaumes, dis Colemans de Fribourt escuier, faisons savoir a tous que com nobles princes Thiebaus, dus de Lohereinne et marchis, nous eust tenu en
    03. sa prison pour Warnier d’Apei qui fut mors a Seint Dyei en la ville et en la justice notre signour le duc desus dit il est assavoir que nous l’avons amendei et adrecié a notre signour le duc
    04. desus dit et li avons promis et prometons que de la prise de nous ne des damages que nous avons eu soit en despens soit en chevaus soit en hernoix ou en autre meniere quels qu’elle soit jemays
    05. riens ne l’en demanderons lui ne ses hoirs ne ses homes ne ceaus que nous prirent ne ceaus que furent a nous panre nous ne autre pour nous. Et est assavoir que pour ladite amende et pour
    06. ce que nostre sires li dus soit plus certeins que nous, notre hoir ne autres pour nous n’en puissiens jemais riens demander de notre prison ne de nos damages a lui, ne a ses hoirs, ne a ses homes,
    07. ne a ses que nous prirent ne qui furent a nous a panre si com desus est dit, nous nous sommes obligié et obljions envers notre signour le duc desus dit et a ses hoirs se de lui defailloit chascuns pour le tout de quatre
    08. cens mars de fin argent bon et leiaul lesquels quatre cens mars notre sires li dus ou sui hoir aprés lui pourroient leveir a lour voluntei de nous et de nostre seurtei que nous lour en avons mis si com ci desouz
    09. est escript s’il estoit ensi que nous, ou aucuns de nous notre hoir, ne autres pour nous alissiens ne feissiens aler encontre ces choses et ces convenences desus dites en tout ou en partie. Et est et doit estre ensi que
    10. se nostre sires li dus desus diz ou sui hoir aprés lui disoient que nous ou aucun de nous notre hoir ou autres pour nous fuissiens ou fuissent alei encontre ces choses et ces convenences desus dites en tout ou en partie
    11. il en seroient creu sans debat de nous ne d’autre pour nous par ensi que nostre sires li dus ou sui hoir aprés lui en eussent tesmongnaige de noble home Jehan, conte de Saumes, ou de monsignour Henri,
    12. signour de Blammont, ou de Burnequin de Riste escuier et des enqui en avant que li dis dus, ou sui hoir, aprés lui diroient que nous, nostre hoir ou aucuns de nous ou autres pour nous averoient mespris en la
    13. convenence desus dite ne mie tenue, en tout ou en partie, et li dis dus, ou sui hoir, aprés lui en averoient le tesmongnaige par bouche ou par lettres de l’un des trois desus dis li dis dus ou sui hoir aprés
    14. lui delai en avant pourroient lever de nous et de nos pleges et remburs ci aprés nommés les quatre cens mars d’argent desus dis se nous ne deffaisiens ou faisiens defaire les damages que fait seroient contre les convenences
    15. desus dites dedens le moix que nous ou aucun de nous en seriens requis dou dit duc, ou de ses hoirs, aprés lui ou de leur certem message et adés seriens tenu nous et notre hoir au dit duc et a ses hoirs aprés lui et de
    16. faire a auls tous les damages que nous ou aucun de nous nostre hoir ou autre pour nous averiens fait au dit duc ou a ses hoirs ou a ses homes ou a ces qui nous prirent et qui furent a nous panre. Et est assavoir
    17. que se de monsignour Jehan, conte de Saumes, de monsignour Hanri signour de Blammont et de Burnequin de Riste defailloit ansois qu’il eussent riens tesmongnié que nous ou aucun de nous notre hoir ou autre
    18. pour nous eussiens alei encontre ces choses et ces convenences desus dites en tout ou en partie delai en avant se li diz dus, ou sui hoir, aprés lui disoient que nous ou aucun de nous notre hoir ou autres pour nous i eussiens
    19. mespris creu en seroient se il en avoient tesmongnaige de dous chevaliers souffisans par lour sairemans et delai en avant pourroient lever les otages des quatre cens mars et aler a nos heritages que nous lour
    20. avons obligé a la meniere ci apres devisee se nous ne lour deffaissiens ou faisiens defaire les damages que fait seroient dedens le tens et en la meniere qu’il est desus devisei. Et toutes ces choses et ces convenences desus dites nous
    21. delivre de nos cors et fuers de toutes prisons avons jurei sus seins a tenir au dit duc et a ses hoirs aprés lui pour nous et pour nos hoirs a toujours mais et se nous, nostre hoir ou aucun de nous ou autre pour nous aliens
    22. de riens encontre en tout ou en partie nous et chascuns de nous pour le tout pour nous et pour nos hoirs en avons obligié et obljions au dit duc et a ses hoirs aprés lui avec l’obligation de quatre cens mars d’argent
    23. si con desus est dit tous les heritages et tous les fiez que nous tenons et tenir devons dou dit duc ou qu’ils soient lesquels heritages li dis dus ou sui hoir aprés lui pourroient panre, saisir et tenir sans debat de nous
    24. de nos hoirs ne d’autre pour nous pour tout faire et pour tout panre tout que nous lour averiens defait tous les damages que lour seroient venu aus ne lour gens ne lour hoirs ne ceaus qui nous prirent ne
    25. qui a nous furent a panre pour les choses et les convenences desus dites ne mie tenues en tout ou en partie de quoi li dis dus ou sui hoir apres lui seroient creu en la meniere que desus est devisee. Et est assavoir que
    26. pour ce que nostre sires li dus desus dis et sui hoir aprés lui soient plus seur des quatre cens mars d’argent dont nous nous sommes obligié envers lui et ses hoirs aprés lui en la meniere desus dite nous en avons mis ple-
    27. -ges et rendours en la mein dou dit duc et de ses hoirs aprés lui nobles homes Jehan conte d’Ansais, Jehan conte de Saumes, Hanri signour de Blammont, monsignour Ancel de Rabaupiere, monsignour Conraut
    28. fil le conte de Fribourt, monsignour Wautier de Grodeset entre Lerni, monsignour Winier con dit le Bon Home de Hazescort, monsignour Agnele de Raustenchouze, monsignour Thierri de Bourquehein, Symon
    29. escuier fil le conte d’Ausais, Burnequin de Riste escuier et Hue de Huezeberch escuier lesquels pleges et rendours nous chascuns pour le tout avons promis et prometons a garentir et a warder de tous damages que
    30. venir lour en pourroient par nos sairemens fais corporelment et sor l’obligation de tous nos biens mobles et non mobles presens et a venir. Et nous li plege et rendour desus dit que prenons le faix de la plegerie et renderie des
    31. quatre cens mars d’argent deusus dis et nous avons promis et prometons au dit duc et a ses hoirs aprés lui que a sa requeste ou de ses hoirs ou de lour certein commandement en tenriens convent a Seint Dyei quinze jours aprés la requeste
    32. faite c’est assavoir nous li cuens d’Ansais, li cuens de Saumes, li sires de Blammont, li sires Ances de Rabaupiere, sires Conraus de Fribourt, messire Wautiers de Godezet outre Rin chascun de nous par un chevalier souffisant et
    33. nous tint li autre plege et rendour desus dit chascuns par un escuier gentil home dont chascuns ait un ronon avec lui a ses propres despens se ensi estoit que li dit Hanris de Rabaupiere, Conraus, Ferris, Har-
    34. -mans et Willaume ne tenissent les convenences si com desus est dit et ne doient partir cil ostages de Seint Dyei qu’il n’i regeussent chascune nuit jusques a tant que tint li damage qui seroient venu au
    35. dit duc ou a ses hoirs aprés lui ou a lour gens lour seroient defait entierement et quant li damage seroient defait reseriens nous adés tenu li plege et rendour desus dit au dit duc et a ses hoirs des quatre
    36. cens mars d’argent ensi com devant. Et voulons nous li plege et rendour desus dit que cil de nous qui ne tenroit convent si com desus est dit que li dis dus ou sui hoir le puissent wagier et faire wagier partout au
    37. sien et tout ce nous li plege et rendour desus dit avons promis a tenir au dit duc et a ses hoirs par nos sairement fais corporelment. Et nous Jehans cuens de Saumes, Hanris sires de Blammont et Burnequin
    38. de Riste escuiers desus dit avons promis et prometons a nostre signour le duc desus dit pour lui et pour ses hoirs par nos fois donées corporelment par la voluntei et par la requeste des desus dis Hanri, Conraut, Ferri, Har-
    39. -mant et Willaume que se il ou aucun d’aus lour hoir ou autre pour aus aloient de riens encontre ces choses et ces convenences desus dites en tout ou en partie que nous a la requeste dou dit duc ou de ses hoirs
    40. tesmongneriens par nos lettres pendans sans fraude et sans loingne faire ce que nous saveriens qu’il lour hoir ou aucuns d’aus ou autres pour aus averoient mespris au choses et au convenences desus dites. En
    41. temongnaige de toutes ces choses desus dites pour ce qu’elle soient fermes et estables nous Hanris de Rabaupiere, Conraus de Hazestat, Ferris, Harmans de Xowartese et Willlaumes dis Colemans de Fribourt
    42. escuier desus dit avons proié et requis a nobles homes Jehan conte d’Ausais, Jehan conte de Saumes, Hanri signour de Blammont, monsignour Ancel de Rabaupiere, monsignour Wautier de Godezet outre
    43. le Rin, monsignour Conraut fil le conte de Fribourt, monsignour Winer de Hozestat dit le Bonhome, Burnequin de Riste escuier qu’il mestent lour saiels en ces presentes lettres en tesmongnaige de veritei avec le
    44. saiel de moi Hanri de Rabaupiere escuier desus dit. Et nous Jehans cuens d’Ausais, Jehans cuens de Saumes, Hanris sires de Blammont, Ancel de Rabaupiere, Wautiers de Grodezet outre le Rin, Conraus fils le conte
    45. de Fribourt, Winers de Hazestat dis le Bonhons et Burnequin de Riste escuiers avons mis nos saiels en ces presentes lettres en tesmongnaige de veritei avec le saiel Hanri de Rabaupiere escuier desus dit a la proiere
    46. et a la requeste dou dit Hanri, de Conraut, de Ferri, de Harmant et de Willaume escuiers desus dis et a la proiere et a la requeste de tous les pleges et rendours desus només. Ces lettres furent faites l’an nostre
    47. Signour quant li miliaires courroit par mil trois cens et trois ans, le lundi devant Pasques flories, on moix de mars.
  •  
    « Lettre de mons(ignour) Henry de Rebaupierre et de ... / ... ... ... ledit s(ignour) Henry ... / et mons(ignour) Thiebaut, duc de Lorrainne (sic), ... » , XVIIe s. « Blamont I », XVIIe s.
  •  
    A.-M. MARIONNET, Catalogue des actes de Thiébaut II, duc de Lorraine (1303-1312) , diplôme d'études supérieures de l'Université Nancy II, Nancy, [1947], n° 62
  •  
    Laura Gili-Thébaudeau

Sigillography

Informations

Document
Laura Gili-Thébaudeau (Université de Lorraine), dans  TRANSSCRIPT
TRANSSCRIPT Project. Writing and Governance. Cultural transfers between France and the Empire (13th-16th centuries), dir. I. Guyot-Bachy (CRULH) et M. Margue (IPSE), éd. électronique TELMA (IRHT), Orléans, 2017 [en ligne], acte n. 252 (transscript-153), http://telma.irht.cnrs.fr/chartes/en/transscript/notice/252 (mise à jour : 19/11/2018).
http://telma.irht.cnrs.fr/chartes/en/transscript/notice/252
transscript/notice/252
XML  JSON