Description
-
Jean XXII (1316-1334)
-
Ad perpetuam rei memoriam
-
IV nonas septembris, anno quarto decimo
-
-
Avignon
-
Bulle (ad perpetuam rei memoriam)
-
[Registre de la chancellerie apostolique] R. CITÉ DU VATICAN, Archivio segreto Vaticano, Registra Vaticana, 93, ep. comm. 652.
-
Ici reprise de Guillaume Mollat, « Études et documents sur l'histoire de Bretagne, XIIIe-XVIe siècle », Annales de Bretagne et des pays de l'Ouest, 24-1, 1908, p. 107-117, aux p. 114-117 [en ligne].
-
A la demande de Jean d'Avaugour et du chapitre de Dol, Jean XXII confirme la charte de fondation d'une prébende instituée le 2 janvier 1293 dans la cathédrale de Dol, sur les revenus de l'église paroissiale de Meillac, par l'évêque Thibaud de Pouancé.
-
Ad perpetuam rei memoriam.
Hiis que interdum in ecclesiis et aliis piis locis ad laudem Dei et divini cultus augmentum tam provide quam salubriter ordinantur, ut illa perpetuis futuris temporibus illibata consistant, libenter adicimus apostolici muniminis firmitatem.
Sane petitio venerabilis fratris nostri Joannis episcopi et dilectorum filiorum capituli Dolensium nobis exhibita continebat quod bone memorie Theobaldus de Poenceyo, episcopus Dolensis, ipsius Johannis predecessor, cupiens in sua Dolensi ecclesia cultum divinum et canonicorum numerum augmentare, de consensu dictorum capituli fundavit et adjecit in eadem ecclesia canonicatum unum cum prebenda super certis decimis, ad ipsius episcopi dispositionem spectantibus, statuens quod canonicus qui prebendam obtineret eamdem et successores ipsius super dictis decimis prebende sue perciperent grossos fructus attendensque parochialem ecclesiam de Meillac sue diocesis adeo redditibus abundare quod quadraginta libre pensionis annue pro cotidianis distributionibus adjuncti canonici predicto capitulo super ea poterant assignari residuumque sufficiebat perpetuo vicario pro sustentatione sui et aliis oneribus ipsius ecclesie supportandis, dictas quadraginta libras annue pensionis certis terminis persolvendas Dolensi capitulo, rectoris tunc ecclesie ipsius interveniente consensu, concessit et etiam assignavit, prout in patentibus litteris inde confectis Theobaldi episcopi, capituli et rectoris predictorum sigillis munitis, plenius continetur, a cujus fundationis tempore triginta septem anni et amplius sunt elapsi. Quare prefati Johannes episcopus et capitulum nobis humiliter supplicarunt ut premissis omnibus et singulis robur apostolice confirmationis adicere dignaremur.
Nos igitur, eorum piis supplicationibus inclinati, premissa omnia et singula rata et grata habentes, illa auctoritate apostolica ex certa scientia confirmamus et presentis scripti patrocinio communimus.
Tenorem vero dictarum litterarum de verbo ad verbum presentibus inseri fecimus, qui talis est :
« Universis presentes litteras inspecturis et audituris Theobaldus, permissione divina Dolensis episcopus, salutem in Domino sempiternam.
Divini cultus augmentum in nostra Dolensi ecclesia toto cordis desiderio cupientes, ad honorem Dei et beati Sampsonis, ob cultum divinum ipsius ecclesie ampliandum, de capituli nostri Dolensis consensu unanimi, ex redditibus superexcrescentibus favente Domino nostris temporibus acquisitis, videlicet super decimis cujuscumque generis bladi consistentibus infra fines parochie de Ros Landrieux, salvo jure dicti capituli in decimis dicte parochie in territoriis, in quibus alias percipere consuevit, et salvis centum solidis annui redditus quos prior Dolensis in eisdem decimis annuatim percipiet et habebit conferendo, constituimus, fundamus et creamus, et constituendo, fundando et creando conferimus viro venerabili et discreto magistro Alano de Castro Gironis, clerico, legum professori, canonicatum ecclesie Dolensis, et unam de novo prebendam cum plenitudine juris canonici in ecclesia memorata, volentes quod canonicus qui dictam prebendam habebit de novo creatam et ejus successores pro tempore in dictis decimis percipiant grossos fructus, investientes eumdem magistrum Alanum per traditionem anuli nostri corporaliter de predictis canonicatu et prebenda.
Verum, quia dictam creationem dicto capitulo Dolensi esse nolumus captiosam cum redditus communes dicti capituli sint tenues et exiles, nec possent competenter sufficere pluribus quam sint in antiquo numero constituti, attendentes etiam ecclesiam de Meillac nostre Dolensis diocesis tantis redditibus abundare quod possunt ex eis quadraginta libre annue pensionis dicto capitulo pro cotidianis distributionibus assignari et residuum sufficere vicario, qui pro tempore fuerit, honeste ad sustentationem sui et suorum, ad onera supportanda, jura episcopalia persolvenda et hospitalitatem tenendam, dicto capitulo Dolensi damus, concedimus et assignamus quadraginta libras annui redditus pro distributionibus cotidianis eidem canonico de novo creato distribuendis super dicta ecclesia de Meillac magistri Johannis de Lannalayo, nunc ipsius ecclesie rectoris, ad hoc requisito et interveniente consensu. Quas quidem quadraginta libras annue pensionis vicarius seu rector dicte ecclesie de Meillac, qui pro tempore fuerit, tenebitur et in sua receptione jurabit solvere et reddere dicto capitulo Dolensi terminis infrascriptis, videlicet in quolibet festo Nativitatis Domini viginti libras et in quolibet festo Nativitatis beati Johannis Baptiste alias viginti libras monete currentis annuatim, dictum capitulum in pensione vel quasi juris percipiendi et habendi dictas quadraginta libras annue pensionis super dicta ecclesia de Meillac exnunc per tradictionem presentium inducentes.
Nos vero, capitulum Dolense et magister Johannes de Lannalayo, rector ecclesie de Meillac, predicti, omnibus et singulis premissis expresse consentimus, et ut hec rata et firma in perpetuum habeantur nos, episcopus et capitulum Dolenses et magister Joannes de Lannalayo prefati ad eternam rei geste memoriam presentes litteras sigillis nostris fecimus communiri, habitis super premissis tractatu et deliberatione diligenti in capitulo ecclesie Dolensis generali ad hoc specialiter convocato.
Actum die veneris in crastino Circumcisionis Domini, anno ipsius millesimo ducentesimo nonagesimo secundo. »
Nulli ergo omnino hominum liceat hanc paginam nostre confirmationis infringere vel ei ausu temerario contraire. Si quis autem hoc attemptare presumpserit indignationem omnipotentis Dei et beatorum Petri et Pauli apostolorum ejus se noverit incursurum.
Datum Avenione, IV nonas septembris, pontificatus nostri anno quarto decimo.
Informations
Document
Clara
Lenne
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 27366 (aposcripta-4073), http://telma.irht.cnrs.fr/chartes/en/aposcripta/notice/27366 (mise à jour : 27/10/2020).