Description
-
Clément V (1305-1314)
-
L'abbé de Montauban, diocèse de Cahors, et le prévôt de Rossac (diocèse de Limoges), Peire de Castrolutio
-
Le moine de Saint-Victor de Marseille (OSB) Gui Carbonier, le préchantre Guilhem de Ruppe et de nombreux autres moines du monastère
-
IV nonas julii, anno octavo
-
-
Prieuré de Grauseau
-
Mandement (littere cum filo canapis)
-
[Registre de la chancellerie apostolique] R. CITÉ DU VATICAN, Archivio apostolico Vaticano, Registra Vaticana 60, ep. 532, fol. 171a.
-
Ici reprise de Regestum Clementis papae quinti, Rome : Typographia Vaticana, 1884-1892, n. 9561.
-
?
-
n. c.
-
Infrascriptis committitur inquisitio monasterii s. Victoris Massilien. ordinis s. Benedicti et citatio abbatis [Regestum].
-
Dilectis filiis.. abbati monasterii de Montealbano et Petro de Castrolutio preposito prepositatus de Rossaco Caturcen. et Lemovicen. diocesium.
Detestanda crimina et enormes excessus, que nobis de prelatis ecclesiarum et monasteriorum pro tempore referuntur, nostrum non modicum perturbant animum et gravem molestiam inferunt cordi nostro, cum illi, quorum opera deberent esse prelucida et sincera, velut proprie fame prodigi et salutis obliti eorum subditis mala exempla tribuunt, inter ipsos scandala ingerunt et ruinas ac dilapidatores in suis administrationibus existentes facultates dilaniant multipliciter et consumunt crimina et excessus multiplicia pro ipsorum voluntatis libito committendo. Unde nos, qui disponente Domino universalis ecclesie regimini presidemus, circa tales manum decet apostolice correctionis apponere, ne ipsi de talibus actibus glorientur et ceteris similia presumendi deinceps materia subtrahatur.
Sane dilectus filius frater Guido Carbonerii monachus monasterii sancti Victoris Massilien. ad Romanam dumtaxat ecclesiam pertinentis ordinis sancti Benedicti nomine suo et fratris Guillelmi de Ruppe precentoris et quamplurium aliorum monachorum ipsius monasterii in consistorio publico in nostra et fratrum nostrorum presentia constitutus exposuit, quod Guillelmus abbas eiusdem monasterii velut in reprobum sensum datus erat homicidii, symonie, periurii, excomunicationis, suspensionis et irregularitatis macula et aliis diversis criminibus irretitus ac incontinentie laborans vitio bona ipsius monasterii dilapidabat enormiter ac etiam consumebat ac ab ecclesiis et prioratibus et aliis locis ecclesiasticis sibi subiectis, que ex officii sui debito visitare tenetur, procurationes auctoritate propria in pecunia numerata in eis visitationis officio non impenso necnon fructus beneficiorum ecclesiasticorum, que pro tempore in dicto monasterio vacaverunt, ad manus suas receperat minus iuste et alias idem monasterium propter ipsius abbatis incuriam et negligentiam in spiritualibus et temporalibus patiebatur non modicam lesionem, et quod multa alia committebat enormia, que redundabant in divine maiestatis offensam et scandalum in populo generabant. Quare dictus frater Guido nobis humiliter supplicavit, ut indempnitati dicti monasterii precavere ac providere in hac parte paterne diligentia studio dignaremur. Nosque volentes more apostolice gravitatis procedere in predictis dilecto filio nostro Raymundo tit. sancte Potentiane presbytero cardinali mandavimus oraculo vive vocis, ut de infamia, qua dictus abbas super premissis respersus existere dicebatur, inquireret, et quod super premissis inveniret, nobis fideliter referre curaret. Dictus itaque cardinalis super huiusmodi infamia ipsius abbatis diligentius inquisito et reperto per eum famam ipsius abbatis lesam existere in premissis nobisque postea super hiis relationem fecit plenariam et fidelem.
Quia vero ex iniuncto nobis apostolatus officio tenemur errata corrigere ac deformata reformare salubriter cunctisque peccandi occasionem subtrahere ac benefaciendi materiam, in quantum possumus, exhibere, de discretione vestra plenam in Domino fiduciam obtinentes discretioni vestre per apostolica scripta mandamus, quatenus ad predictum monasterium personaliter accedentes ac habentes pre oculis solum Deum contra dictum abbatem super premissis et aliis omnibus, prout discretioni vestre visum fuerit expedire, necnon contra priores, officiales et monachos in dicto monasterio residentes auctoritate nostra inquisitionis officium in dicto monasterio vel alibi, ubi tutius et comodius vobis videbitur expedire, exercere curetis, recepturi quosque testes ydoneos, quos dicti denuntiatores vel eorum aliquis super premissis coram vobis duxerint producendos, eosdem testes ad prestandum de veritate dicenda in premissis et premissorum quolibet corporaliter iuramentum cogendo necnon et contradictores, si qui fuerint, monitione premissa per censuram ecclesiasticam appellatione remota, si necesse fuerit, compescendo, facientes ab eodem abbate de bonis ipsius monasterii predictis denuntiatoribus expensas necessarias ad prosecutionem huiusmodi negotii oportunas nichilominus exhiberi, dictum abbatem ad id, si necesse fuerit, monitione premissa per censuram eandem appellatione postposita compellendo. Non obstantibus si aliquibus a sede apostolica sit indultum, quod excomunicari aut interdici nequeant vel suspendi per litteras apostolicas, que de indulto huiusmodi plenam et expressam non fecerint mentionem, interdicentes ex tunc auctoritate predicta eidem abbati omne genus alienationis de bonis monasterii supradicti, et si quam vel si quas alienationes per eundem abbatem post huiusmodi interdictum per nos factum fieri forsan contigerit, ipsam sive ipsas ex nunc irritas decernimus et inanes, adempta per vos dicto abbati nichilominus auctoritate seu potestate mutandi seu incarcerandi et alias interim corrigendi monachos monasterii antedicti, correctione regulari dumtaxat excepta, prefixo dicto abbati et aliis, quorum interest, termino peremptorio competenti, quod personaliter se apostolice sedis conspectui representent pro meritis recepturi ac facturi et recepturi super hiis, quod ordo dictaverit rationis. Diem vero huiusmodi prefixionis et formam et ea, que in predictis inveneritis et duxeritis faciendum, nobis per vestras litteras harum seriem continentes vestris sigillis inclusas fideliter dicte sedis conspectui presentare curetis.
Datum in prioratu de Grausello, IV nonas julii, anno octavo. -
(a) ?
-
(b) ?
-
(c) ?
-
(d) ?
-
(e) ?
-
(f) ?
-
1. ?
-
2. ?
-
3. ?
-
n. c.
Informations
Document
Julien
Théry
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 192932 (aposcripta-40672), http://telma.irht.cnrs.fr/chartes/en/aposcripta/notice/192932 (mise à jour : 21/06/2024).