« aposcripta-425 »

Venerabili fratri Petro1, episcopo Maranen., salutem, etc. — Precunctis nostre mentis... Sane dolentes accepimus quod in insula Corsice adeo heretice infidelitatis diversimode error invaluit quod ibidem quamplurimi a via veritatis prorsus aversi euntes post devinum falsitatis ac se ipsos diversis et variis heresibus maculantes pestiferas ad concutiendum orthodoxe murum fidei machinas construunt mollientes ipsam fallacium argumentationum dolosis, falsis et vulpinis impulsibus demoliri ; verum, licet ubilibet Sedis apostolice diligentia contra talium periculosam et dolosam astutiam, ne diffusius huiusmodi serpat morbus, remedium libenter adhibeat oportunum, in predicta tamen insula cupientes anxie ut negotium fidei iugi profectu elisis omnino quibuslibet erroribus, heresumque quarumlibet eradicatis vepribus forcius convalescat, studemus ad hoc nec immerito per nos et alios attentius vigilare ; providemus itaque in predicta insula aliquam circumspectam personam ad presens quo tanto negotio deputari, cuius honesta conversatio exemplum tribuat puritatis et doctrinam fundant erudita labia salutarem ut sacro ipsius ministerio ac vigili studio et sollicitudine indefessa prefata insula ab huiusmodi pravis contagiis assistente divina gratia expurgetur ac fidei catholice nitor multiplicetur et solidetur ibidem et clarius et lucidius elucescat in Dei honorem et eiusdem fidei incrementum, soliditatem et statum. Cumque de prudentie tue industria, de qua nobis a fidedignis laudabile testimonium perhibetur, plenam in Domino fiduciam habeamus, propter quod ad ministerium tuum ad id specialiter exequendum et debite ac prout tanti negotii requirit assiduitas vigiliter et solicite prosequendum eligimus, fraternitati tue per apostolica scripta sub virtute sancte obedientie firmiter precipiendo mandamus in remissionem tibi peccaminum iniungentes, quatinus Inquisitionis officium in prefata insula contra hereticos, credentes, fautores, defensores et receptatores eorum iuxta formam canonum et auctoritatem fratribus ordinis beate Marie de Monte-Carmeli, cuius professor existis, inquisitoribus huiusmodi pravitatis deputatis auctoritate apostolica et imposterum deputandis concessam solerter et solicite exequi studeas et procures. Nos enim te ad prefatum officium exequendum in dicta insula expresse deputamus ac illam potestatem et auctoritatem te habere volumus in dicta insula, que fratribus dicti ordinis, inquisitoribus pravitatis heretice in aliis locis et provinciis in quibus eam exercent, noscitur esse concessa, ac in extensione predictorum plenam tibi concedimus iuxta formam canonum tenore presentium facultatem2. Et quia extirpationem predictarum heresum que in dicta insula periculose pululare dicuntur et incrementum catholice fidei zelamus ex corde, volumus [et] mandamus ut frequenter de statu fidei in dicta insula et executione tui officii nos informare procures ut si per te ad extirpationem prefatarum heresum et hereticorum, credentium, fautorum, defensorum et receptatorum ipsorum conculcationem aliud remedium adhiberi oporteat certificati per te possimus officii nostri debitum in predictis et ea contingentibus salubriter impartiri. Per hoc autem locorum diocesanis nullum volumus preiudicium generari. Presentibus post quinque annos minime valituris. — Datum apud Pontem Sorgie, Avinion. diocesis, ii idus maii, anno secundo.