« actes_ducs_capetiens_bourgogne-2 »
Document | actes-ducs-capetiens-bourgogne/notice/176519
Description
-
Eudes IV
-
Point de Mussy, chevalier le duc
-
Echange
Description de l'acte
Identification du témoin
-
A. Dijon, ADCO, 1H748
n.c. -
Anne-Lise Courtel, La chancellerie et les actes d'Eudes IV, duc de Bourgogne (1315-1349), vol. II, n°3.
complet
Sceau
-
non
Eudes IV.Jadis scellé sur double queue de parchemin.
Analyses
-
Eudes IV donne à Point de Mussy, son chevalier, une rente annuelle et perpétuelle de 32 livres et 10 sous digenois à percevoir sur les marcs de Dijon en échange de vignes, champs, prés, tierces, censives et hommes de main-morte situés à Grignon et Benoisey avec la justice et la seigneurie. La rente en question sera tenue en fief lige du duc.
Texte
-
Nous, Eudes, dux de Borgoigne, façons savoir à touz que entre nous et nostre amé et feaul chevalier, mon seignour Point de Mussey, havons fait et façons permutacion ou eschange en la meniere qui s'ansuit : c'est à savoir que lidiz mes sires Poinz nous hay baillié et délivré en heritaige perpétuel par leaul permutacion ou eschange les vignes, terres, prez, hommes taillaubles et esploitaubles haut et bas et de main morte, cens, costumes, tierces et autres choses, si comme il est ci dessous escript ensamble la justice et la seignerie que il havoit esdiz leux, les quelles choses sont à Grignon, à Benoisey, es finaiges et es appartenances, et les quelles estoient de nostre fié ; c'est à savoir ou finaige de Buillon, la vigne Burce, la vigne au Lamberton, tenenz ensamble et tenenz à la vigne Girart Prissey, d'une part, et la vigne Henriot, de Benoisey, d'autre, et qui contiennent quinze ovrées ; item, la vigne de la Chievre, seant oudit finaige, tenant es anfanz de Mussey, d'une part, et la vigne Poinçet de Grignon, d'autre part, qui contient huit ovrées ; item, la vigne au Preste, tenant à la vigne à la contesse, d'une part, et la vigne doudit Poinçot, d'autre, qui contient huit ovrées ; item, la vigne de Hautes, tenant à ladite contasse, d'une part, et la vigne doudit Poinçot, d'autre, qui contient soze ovrées ; item, la vigne dou Clous, tenant es anfanz de Mussey, d'une part, et la vigne es anfanz de la Monte, d'autre, qui contient vint ovrées ; item, une ovrée de vigne que l'on dit la vigne Robin, assise en Buillon, tenant à Girart, fil Henriot, les quelles vignes dessus dites estoient assises en la justice doudit monseignour Point ; item, en la coste souz Grignon, une piece de vigne, seant dessouz le clous a lad. contesse et la vigne dessus le clous à ladite contesse, qui contient vint et quatre ovrées, et sont assises en la justice à ladite contesse ; terres et tierces assises en la justice a lad. contesse. Item, s'ansuiguent li prez assis en la Farde : premiers une piece de prey que l’on dit le pré dou Sexte, tenant à Penitot de Grignon, d'une part, et au pré es anfanz de Mussey, d’autre part, qui contient huit soictures ; item, le prey Rondot, tenant et partant es prez de Fontenay, d'une part, et es prez à ladite contesse, d'autre, qui contient une soicture et demie ; item, le prey que l'on dit le prey Brullié qui part à ladite contesse, qui contient une secture et dimée ; item, le prey Bruillié, tenant es anfanz de Mussey, d'une part, et au Ruf, d'autre ; item, hun jornaul de terre tenant audit prey ; item, hun sauciz et estoient lidit prez assis en la justice doudit mon seignour Point. item, s'ansuiguent les censies de Benoisy et de Grignon qui portent lous et ventes : Hugues li Loz, hun quartaul avoinne de costume, de son mes tenant à Damere et d'une corv"e de terre seant en Commostre, et doux chappons ; item, Jaquoz li Royers, dou champ de la Melaidere, trois deniers digenois ; item, Girarz Prissey,dou prey qui fuit Bracoy dessouz Benoisey, dous deniers digenois ; item, lidiz Girarz, de la mammote qui fuit au Chat, une maaille digenois de cense ; item, lidiz Girarz, de son prey de l'Amie, une maaille digenois de cense ; item, lidiz Girarz Prissey, de la lamme devant le molin, dous deniers digenois ; item, lidiz Girarz, de son champ dessus la vigne, doux deniers digenois de cense ; item, lidiz Girarz, de son mes et de sa maison, une emine d'avoinne à la mesure de Mombart ; item, lidiz Girarz, de son champ de Roiches, hun boisseaul d'avoinne à ladite messure ; item, li Chastrez, ses freres, dou prey dou Bouisson, dous deniers digenois ; item, lidiz Chastrez, de son champ des Roiches, trois boisseaux d'avoinne, à la mesure de Flavigné ; item, Amiote, fille Girart Martin, de son prey de Longue Roy, une maaille ; item, ladite Amiote, de sa lamme amprés le prey de Chalonge, une maaille ; item, ladite Amiote, de sa lamme dou fossey Robelin, une maaille ; item, ladite Amiote, de son champ dou Chaisne, une maaille ; item, ladite Amiote de la vigne Girart Martin, hun denier digenois ; item, ladite Amiote, de son prey Rondot, sept deniers digenois ; item, Girarz, fiz Henriot, de son mes et de sa maison, doux deniers digenois ; item, lidiz Girarz, de sa vigne qui fuit Robin, hun denier digenois ; item, lidiz Girart, de sa plante de Deserrée, une maaille digenois ; item, lidiz Girarz, de sa vigne qui fuit Menier, doux deniers digenois ; item, Horrioz, de la lamme devant le molin, doux deniers digenois ; item, lidiz Horrioz, dou desert qui fuit Thierry, une maaille ; item, lidiz Horrioz, de la demie secture de pré dou Jouchat, une maaille ; item, lidiz Horrioz,dou prey au Lamberton, une maaille digenois ; item, lidiz Horrioz, de son prey de l’Amie, une maaille digenois ; item, la vigne de Commostre tenant es anfanz de Mussey de doues pars, qui contient huit ovrées et estoient assises en la justise doudit monsoignour Point ; item, la vigne de Commostre qui fuit Jehan de Quincy, tenant à Guiot Blanche, d’une part, et es anfanz Marot,d’autre,qui contient soze ovrées, et estoit l'uttayme partie de ladite vigne assise en la justice doudit mon seignour Point ; item, la vigne au Lamberton qui siet vers le boisson Raoul, tenent à Orriot, d'une part, qui contient doues ovrées et estoit assise en la justice doudit monseignour Point. item, s’ansuiguent les terres gaaignaubles assises esdiz finaiges : une piece de terre assise en la montaigne, tenant à la voye de la riviere, d'une part, et Hugon le Lot, d'autre, qui contient doux jornaux ; item, hun journaul es Closeaux tenant es anfanz au prevost Girart des Granges ; item, ou bas de la riviere, doux journaux de terre tenant à Girart Parisé ; item, dix jornaux de terre sur la Corvale, tenanz au prevost Girart Jobelin ; item, quatre jornaux de terre ou champ de Perrotes, tenanz au chemin de Semur, d'une part, et a Perrenot le fil Symont, d'autre ; item, quatre jornaux de terre dessouz Vie, tenant es hoirs mon seignour Helie ; item, hun jornaul de terre dessus la plante Raoul, qui fuit l'avesque ; item, dessus la Marfontainne, doux jornaux de terre, tenanz à Jehan Corboillot ; item, sur Poiz Primant, hun jornaul tenant à Jehan, le fil Guiot ; item, s'ansuiguent les tierces de la Montaigne de Grignon, qui valent de annuel rante, chascun an, douze setiers de blef, froment et avoinne par mei, et sont lesdites [...] item, lidiz Horrioz, de son mes et de sa maison, doux deniers digenois ; item, lidiz Horrioz, de sa vigne des Roiches, hun denier digenois ; item, lidiz Horrioz, de sa vigne qui fuit Menier, dous deniers digenois ; item, lidiz Horrioz, de doues pieces de terre dessus le coltil Vincent Regné, une maille ; item, li filz Loigerot et li genres au Boisset, de lour vigne darriers le mostier, dous deniers digenois ; item, Robelins, de son mes et de sa maison, hun quartaul d’avoinne ; item, s'ansuiguent li non des hommes et des femmes que lidiz mes sires Poinz havoit à Benoisey et à Grignon, taillaubles et esploitaubles et de main morte, les quex lidiz mes sires Poinz nous hay bailliez ensamble lour mes et lour tenemanz : c’est à savoir Girarz Prissey, Amiote, fille Girart Martin, Jehanz Tartre, Girarz fiz Horriot ; item, Horrioz li Rauclez, de Grignon, Hugues liLoz, Perrenoz li Aubertons, des quex hommes et mes la justice estoit doudit monseignour Point. Pour les quelles choses bailliés et delivrées à nous doudit monseignour Point, les quelles il nous doit et hay promis à garantir, nous li baillons et delivrons en heritaige perpetuel, por les causes devant dites, por lui et por ses hoirs et por ces qui de li hauront cause, sexante et dix livres, à la monoie de dygenois quinzains à bons petiz tornois forz, de annuel et perpetuel rante, à panre et à percevoir de lui et des siens et des haianz cause de lui ou des siens, chascun an le mardi devant Pasques flories, c'est à savoir en nostre vile de Dyjon, des deniers des marz de nostre dite vile, trante et doues livres et dix solz desdiz digenois, les quex marz nous obligeons par ce expressemant et nommeemant audit mon seignour Point et es siens, et auximant toutes nos rantes et yssues que nous havons ne povons havoir en la ville de Dyjon ; et seray tenuz nostres maires de nostre dite vile qui par le tamps seray ou ciz qui par le tamps seray reciverres de nos diz marz chascun an, de jurer et de faire sairement en la main doudit mon seignour Point et des siens ou de ces qui hauront cause de lui ou d’aux ou de lour certain commandemant portant ces lettres originelx ou le transcript d'icelles, saelé de seaul attentique, que il paieront chascun an es termes et leux dessus diz, lesdites trente et doues livres et dix solz digenois dessus diz audit mon seignour Point et es siens ou à ces qui de lui ou d'aux hauront cause ou à lour commandemant, sanz delay et sanz ampoichement nul, et que il ne bailleront ne delivreront à nous ne à nos successours ne à autre persone quele que elle soit, denier des deniers de noz diz marz jusques à tant que pleniere sattiffacions soit faite desdites trante et doues livres et dix solz. Et mandons par la tenour de ces presentes lettres à celui ou à ces qui hi sont ou par le tamps seront recevour de nos diz marz que il paioient audit mon seignour Point et es siens ou à ces qui de lui ou d'aux hauront cause ou a lour dit commandemant, sanz atandre commandemant de nous, de nos hoirs ou successours, lesdites trante et doues livres et dix solz, chascun an, au leu et au terme dessus diz, et que il facient le sairemant en la meniere que ci dessus est escript. Et sont et demorent lesdites trante et doues livres dix solz de nostre fié lige à touz jours mais. Et se ou tamps à avenir havoit deffaut en la paie dessus dite, dou tout et en partie, et qu'il ou li sien ou cil qui de lui ou d'aux hauront cause hi facient ou sostenient despens, costemanz, missions, dommaiges ou interest, nous sumes tenuz dou paier et dou randre, les quelles choses toutes et une chascune par soy, nous, en bone foy et sur l'obligacion de nous, de nos hoirs et de nos biens, prometons tenir et garder fermemant sanz venir en contre, par nous ou par autre, taisiblemant ou expressemant, ne consentir que autres hi veingne, et garantir audit mon seignour Point et es siens ou a ces qui de lui ou d'aux hauront cause contre touz et envers touz. Ou tesmoing de la quel chose, nous havons fait mettre nostre seaul en ces lettres qui furent faites et donees a Aisey, le mardi jour de la Magdeloinne, l'an de grâce mil trois cenz et quinze.
-
Point de Mussy
-
Grignon
-
Benoisey
Informations
Document
David
Bardey
(Université de Bourgogne), dans
Actes (ducs cap. de Bourgogne)
label.quote.actes-ducs-capetiens-bourgogne