« bullarium-franciscanum-3886 »

Venerabili fratri Roberto episcopo Enaghdunen.

Ex suscepto servitutis officio etc. Olim siquidem quondam Guilberto,a qui pro episcopo Enaghdunen. se gerebat, exponente nobis, se fore per venerabilem fratrem nostrum Malachiam archiepiscopum Tuamen. episcopatu Enaghdunen.b ecclesiae indebite spoliatum, et petente se restitui ad eamdem; magistro vero Andrea Ioannis Giberti de Florentia, procuratore archiepiscopi supradicti, in nostra praesentia constituto, procuratorio nomine ipsius asserente, dictam ecclesiam Enaghdunen. non cathedralem sed parochialem existere ac archiepiscopali mensae Tuamen. canonice unitam fore, et propter hoc petita per Guilbertum supradictum fieri non debere: nos causam huiusmodi bon. mem. Petro tit. s. Stephani in Coelio monte presbytero cardinali, sanctae Romanae ecclesiae vicecancellario, de plano sine strepitu et figura iudicii audiendam commisimus et nobis postmodum referendam. Post multos vero processus inter partes easdem habitos in causa huiusmodi coram cardinali praedicto, cum dictus Guilbertus apud sedem apostolicam naturae debitum persolvisset, nos nolentes praedictam Enaghdunen. ecclesiam legitimo defensore carere, venerabilem fratrem nostrum Iacobum Coneren., tunc nullius ecclesiae, episcopum eidem Enaghdunen. ecclesiae de consilio fratrum nostrorum praefecimus in episcopum et pastorem, salvo in praemissis iure dictae ecclesiae Tuamen.; et deinde dictum Iacobum a vinculo, quo dictae Enaghdunen. ecclesiae tenebatur, de apostolicae potestatis plenitudine absolventes, ipsum ad ecclesiam Coneren. tunc vacantem de praedictorum fratrum consilio duximus transferendum ipsumque illi praefecimus in episcopum et pastorem. Postmodum autem eodem cardinale rebus humanis exempto, nos venerabili fratri nostro Petro episcopo Praenestino commisimus oraculo vivae vocis, ut de omnibus actis in eadem causa coram cardinali praefato habitis se diligentius informaret, ea nobis postmodum fideliter relaturus; cumque facta nobis per Praenestin. episcopum supradictum super praedictis relatione fideli per relationem eamdem nobis legitime constitisset, dictum Guilbertum tempore, quo spoliatus fuit per dictum archiepiscopum, fuisse in possessione (vel quasi) episcopatus Enaghdunen. praedicti, et ipsam Enaghdunen. ecclesiam fuisse dicto tempore in possessione status et dignitatis ecclesiae cathedralis: nos dictam Enaghdunen. ecclesiam ad possessionem (vel quasi) status et dignitatis cathedralis ecclesiae restituimus et etiam reintegramus iustitia exigente, quaestione proprietatis in eadem Enaghdunen. ecclesia parti utrilibet reservata.

Nolentes igitur, quod dicta Enaghdunen. ecclesia remaneat ulterius defensoris praesidio destituta, ac de utili provisione ipsius sollicite cogitantes, cum nullus praeter nos de ipsius ecclesiae Enaghdunen. ordinatione se intromittere possit ....,c post deliberationem, quam ad deputandum eidem ecclesiae personam idoneam habuimus cum eisdem fratribus diligentem, demum ad te ordinis fratrum Minorum, de religionis zelo, vitae munditia, litterarum scientia, prudentia spiritualium et providentia temporalium aliisque virtutum meritis fide dignorum testimonio commendatum, direximus oculos nostrae mentis, quamvis tu olim dicti ordinis fratrum Minorum existens ecclesiae Clonferten. tunc pastore carentis in episcopum in discordia electus, post appellationem ab huiusmodi electione tua ad sedem apostolicam interiectam, obtinueris in illis partibus electionem huiusmodi confirmari tibique munus consecrationis impendi et administrationi dictae Clonferten. ecclesiae in spiritualibus et temporalibus contra sanctiones canonicas nihilominus te ingesseris: super quibus tecum de uberioris dono gratiae auctoritate apostolica dispensamus, omnem inhabilitatis notam et infamiae maculam, quam propterea incurristi, de praedictae potestatis plenitudine penitus etiam abolendo. Attendentes itaque, quod sic consecratus nullius ecclesiae episcopus remansisti, et consideratis praedictis tuarum virtutum meritis, nolentes, quod indigentia rerum temporalium excellentiam pastoralis obnubilet dignitatis, de persona tua dictae Enaghdunen. ecclesiae de praedictorum fratrum consilio auctoritate praefata providemus teque illi in episcopum praeficimus et pastorem, curam et administrationem ipsius tibi in spiritualibus et temporalibus plenarie committendo, iure dictae Tuamen. ecclesiae super quaestione proprietatis praedictae in omnibus semper salvo, cui per huiusmodi provisionem nostram nullum volumus praeiudicium generari etc. Datum Avinione, VI idus novembris, anno decimo.d